Рудный қаласында Республика күніне орай Мемлекеттік Туды көтеру салтанаты өтті

Бүгін Республика күніне арналған мерекелік шара аясында Рудный қаласының орталық алаңында Қазақстан Республикасының Мемлекеттік Туын көтеру салтанаты өтті. Іс-шараға Қостанай облысының әкімі қатысты.

Өңір басшысы өз сөзінде 35 жыл бұрын қабылданған Мемлекеттік егемендік туралы Декларация Қазақстанның тәуелсіз даму жолын бастаған тарихи маңызы зор шешім болғанын атап өтті. Мемлекеттік Туды көтеру рәсімі – елдігіміз бен бірлігіміздің, мемлекет тұтастығының салтанатты көрінісі.

Президент Қасым-Жомарт Кемелұлы Тоқаев атап өткендей, өңірлердің өркендеуі Қазақстанның тұрақты дамуының негізгі кепілі болып табылады. Осы бағытта Қостанай облысында ауқымды жұмыстар атқарылуда. Соңғы жылдары өңір экономикасына 5,3 триллион теңгеден астам инвестиция тартылып, машина жасау саласы өндіріс көлемі бойынша республикада бірінші орынға шықты. Әлемдік брендтермен бірлескен жоғары технологиялық кәсіпорындар іске қосылып, соның ішінде KIA автомобиль зауытының ашылуы ерекше маңызға ие болды. Тұрғын үй құрылысы да қарқын алып, 1 миллион шаршы метрден астам баспана пайдалануға берілді. Жол-көлік инфрақұрылымы жаңартылып, 1 400 шақырым автожол жөнделді. Білім беру, денсаулық сақтау және спорт инфрақұрылымы белсенді түрде дамуда. Жүргізілген барлық жұмыстар өңірдің шикізаттық бағыттан заманға сай индустриялық орталыққа айналуына негіз болып отыр.

Рудный қаласы – облыстың экономикасын ілгерілетіп отырған жетекші индустриялық орталық. Қалада жаңа өндірістер ашылып, стратегиялық жобалар жүзеге асырылуда. «ССГПО» базасында ыстық брикеттелген темір өндіретін ірі зауыттың құрылысы басталды, бұл тәуелсіздік жылдарындағы металлургия саласындағы ең көлемді жобалардың бірі саналады.

Салтанатты шара соңында өңір басшысы қала тұрғындарын ұлттық мерекемен құттықтап, еліміздің амандығын, бірлігін және тәуелсіздіктің мәңгі болуын тіледі. Ресми бөлімнен кейін тұрғындар үшін мерекелік концерт ұйымдастырылды.