Белсенді ұзақ өмір сүру орталықтары жыл соңына дейін Қазақстанның барлық өңірлерінде ашылады
2021 жылдың соңына дейін Республиканың 8 облысында белсенді ұзақ өмір сүру орталықтары ашылады. Нәтижесінде қарт адамдардың денсаулығын қолдау және бос уақытын ұйымдастыру жөніндегі мекемелер Қазақстанның барлық өңірлерінде жұмыс істейтін болады. Бұл туралы Аға буын азаматтардың жағдайын жақсарту жөніндегі ведомствоаралық комиссияның бірінші отырысында ҚР Еңбек және халықты әлеуметтік қорғау вице-министрі Ерлан Әукенов хабарлады.
Іс-шараға Еңбек және халықты әлеуметтік қорғау, денсаулық сақтау, мәдениет және спорт министрліктерінің, сондай-ақ жергілікті атқарушы органдардың өкілдері қатысты.
Отырыс барысында денсаулық сақтау жүйесін жетілдіру және қарт адамдардың бос уақытын ұйымдастыру үшін жағдай жасау мәселелері талқыланды.
ҚР Еңбекминінің өкілдері 2025 жылға дейінгі «Белсенді ұзақ өмір сүру» аға буын азаматтарының жағдайын жақсарту жөніндегі іс-шаралар жоспарын іске асыру барысы туралы хабардар етті. Ол жергілікті бюджет есебінен белсенді ұзақ өмір сүру орталықтарын құруды көздейді. Бүгінгі күні мұндай орталықтар 9 өңірде: Нұр-Сұлтан, Алматы, Шымкент қалаларында, Ақмола, Жамбыл, Қарағанды, Қостанай, Ақтөбе және Түркістан облыстарында ашылып, жұмыс істеуде.
Орталықтардың жұмысы қарт адамдарға денсаулықты қолдау бойынша көмек көрсетуге, қолайлы және кедергісіз орта құруға, оларды қоғамдық өмірге тартуға бағытталған. Онда йога, скандинавиялық жүріс, айкуне бойынша сабақтар өткізіледі; медициналық, психологиялық және заң консультациясы; IT және smart-сауаттылыққа, шет тілдеріне оқыту; көшпелі іс-шараларды ұйымдастыру, мәдени объектілерге бару; тақырыптық концерттер мен өзге де іс-шаралар өтеді.
«Ардагерлер мен зейнеткерлерге қамқорлық жасау, қарт адамдардың өмір сүру сапасын жақсарту, оның ішінде жүйелі бос уақытты ұйымдастыру, ішкі шығармашылық әлеуетті іске асыру үшін жағдай жасау, оларды қоғамның белсенді өміріне тарту мемлекеттік саясаттың басым бағыттарының бірі болып табылады. Осы орталықтардың жасы ұлғайған азаматтарды қоғамға әлеуметтендірудегі маңыздылығын ескере отырып, осы жылдың соңына дейін қалған өңірлерде осындай орталықтар ашу қажет», – деп атап өтті ҚР Еңбек және халықты әлеуметтік қорғау вице-министрі Ерлан Әукенов.
Егде жастағы адамдардың денсаулығын сақтауды жетілдіру бөлігінде емханалар жанынан гериатриялық кабинеттер ашу мәселелері қаралды.
Ерлан Әукенов өңірлер деңгейінде жұмыс істейтін денсаулық сақтаушы және денсаулықты нығайтушы технологияларды айқындау, сондай-ақ денсаулықты сақтау үшін неғұрлым маңызды іс-шараларды өзектендіру қажет екенін атап өтті. Вице-министр алдын алу шараларына ерекше назар аударуға шақырды.
Отырыс барысында Алматы қаласы әлеуметтік әл-ауқат басқармасының басшысы Алмасбек Құрманғалиев пен Ақмола облысы жұмыспен қамтуды үйлестіру және әлеуметтік бағдарламалар басқармасының басшысы Дина Ахметжанова аға буын азаматтарының жағдайын жақсарту жөніндегі өңірлік жоспарлардың орындалуы туралы баяндама жасады.
Естеріңізге сала кетсек, 2025 жылға дейінгі «Белсенді ұзақ өмір сүру» іс-шаралар жоспарын ҚР Еңбек және халықты әлеуметтік қорғау министрі Серік Шәпкенов 2021 жылғы ақпанда бекіткен болатын. Ол егде жастағы адамдардың өмір сүру сапасын арттыру, халықтың салауатты өмір сүру ұзақтығын арттыру, қарт адамдардың әлеуметтік және психологиялық әл-ауқатын жақсарту, егде жастағы адамдардың қоғам өмірінің әртүрлі салаларына, елдің әлеуметтік-экономикалық дамуына қатысу мүмкіндіктерін кеңейту үшін іс-шараларды көздейді. Осы Жоспарды іске асыру үшін үлкен жастағы адамдардың жағдайын жақсарту мәселелері бойынша ведомствоаралық комиссия құрылды.
Қазақстанда 65 жастан асқан шамамен 1,5 млн адам немесе бүкіл халықтың 7,8% - ы тұрады. Бұл көрсеткіш соңғы 6 жылда 1% - ға өсті (2015 жылы 6,8%).