Рудный қаласында есірткі жарнамасын таратумен айналысқандар ұсталды

 

 

Полиция есірткі заттарын заңсыз жарнамалауға қатысы бар екі ер адамды ұстады.

Психотроптық заттарды сатып алу және курьер болып «жұмысқа орналасу» туралы ұсыныстары бар хабарландырулар тұрғын үйлердің қабырғаларында және қоғамдық орындарда пайда болған.

Есірткі қылмысына қарсы іс-қимыл бөлімшесінің қызметкерлері жүргізген жедел-іздестіру іс-шаралары барысында Теміртау және Рудный қалаларының екі тұрғыны ұсталды.

Олардың тұрғылықты мекенжайлары бойынша жүргізілген тінту барысында полицейлер синтетикалық есірткінің мөлшерін анықтады.

Медициналық куәландыру нәтижесінде аталған азаматтардың каннабиноидтарды және басқа да психоактивті заттарды қолданғаны белгілі болды.

Есірткі заттарын насихаттау және заңсыз жарнамалау фактісі бойынша сотқа дейінгі тергеп-тексеру басталды.
Мұндай әрекеттер үшін заңнамада мүлікті тәркілеумен немесе онсыз үш жылға дейін бас бостандығынан айыру жазасы көзделген.

Полиция тұрғындарды есірткі заттарын тарату және жарнамалау деректері туралы хабарлауға шақырады — мұндай ақпараттар қылмыстарды жедел түрде тоқтатуға мүмкіндік береді.