Қазақстанда мемлекеттік қызметтерді реформалау жоспары жаңартылды: 90% - электрондық форматта

Үкімет қаулысымен Қазақстанда мемлекеттік басқаруды дамытудың 2030 жылға дейінгі тұжырымдамасын іске асыру жөніндегі іс-қимыл жоспарына өзгерістер енгізілді, деп хабарлайды Kazinform агенттігінің тілшісі.

Құжатқа сәйкес, орталық және жергілікті атқарушы органдар, сондай-ақ Қазақстан Президентіне есеп беретін мемлекеттік органдар мен мүдделі ұйымдар:

Іс-қимыл жоспарын орындау жөнінде шаралар қабылдасын;
жылына екі рет, 5 шілдеге және 20 желтоқсанға дейін ҚР Ұлттық экономика министрлігіне іске асырылу барысы туралы есеп берсін.

Ұлттық экономика министрлігі жиынтық ақпаратты Үкімет аппаратына - 25 шілдеге және 5 қаңтарға дейін ұсынады.

Бұдан басқа, іс-қимыл жоспарының өзі жаңа редакцияда жазылған.

2030 жылға дейінгі негізгі күтілетін нысаналы көрсеткіштер:

0,89 - электрондық үкіметтің даму индексі (БҰҰ әдістемесі бойынша);
20 минут - топ-50 мемлекеттік қызмет көрсетудің шекті мерзімі, бұл ретте адами фактор толығымен алынып тасталады;
Мемлекеттік қызметтердің 90% -ы тек қана электрондық форматта ұсынылуы тиіс;
Халықтың әлеуметтік осал топтары үшін мемлекеттік қызметтердің 50% - проактивті форматта.

Естеріңізге сала кетейік, Қазақстан Президенті 2030 жылға дейінгі мемлекеттік басқаруды дамытудың жаңартылған тұжырымдамасын бекітті.