Мемлекеттік аппаратқа келісім-шарт бойынша жұмыс істейтін қызметкерлерді тарту.

Мемлекет басшысы Мемлекеттік басқаруды дамыту тұжырымдамасында мемлекеттік бастамалар мен салалық жобаларды жүзеге асыру кезеңіне арнайы білімі бар мамандарды тарту мақсатында келісім-шартпен жұмыс істейтін қызметкерлер институтын енгізуді тапсырды.
Заңнамаға «келiсiм-шарт бойынша қызметкер» - түрлерiн Үкiмет белгiлейтiн ұлттық және өзге де жобаларды iске асыру үшiн ерекше белгiлерi бар шарт бойынша мемлекеттiк органға тартылатын Қазақстан Республикасының азаматы ұғымы енгiзiлдi. Қазақстан Республикасы Үкіметінің 2023 жылғы 16 маусымдағы қаулысымен Келісімшарт бойынша жұмыс істейтін қызметкерлерді тарту қағидалары, келісімшарт бойынша жұмыскерлер тартылатын жобалардың түрлері, еңбекақы төлеу шарттары мәселелері және олардың қызметін реттеудің өзге де мәселелері бекітілген.
Осы Қағидалар «Қазақстан Республикасының мемлекеттік қызметі туралы» Заңының 64-1-бабының 3-тармағына сәйкес әзірленді. Қазақстан Республикасының 18 жасқа толған, дені сау, қызметтік міндеттерін орындауға қажетті мөлшерде, медициналық қорытындыға сәйкес, қабілетті, жұмыс тәжірибесі және жобаны іске асыру саласына сәйкес бейіні бойынша білімі бар және т.б. Келісімшарт бойынша қызметкер ретінде тартылуы мүмкін. Ережеге сәйкес, кандидатурасын мемлекеттік органның бірінші басшысы бекіткен тұлғаны келісім-шарт бойынша қызметкер ретінде тарту жұмыс берушінің актісін беру және шарт жасасу арқылы жүзеге асырылады.
Келісімшарт бойынша қызметкерді тарту қажеттігі туралы шешім қабылданған жағдайда жобаны іске асыруға жауапты мемлекеттік органның лауазымды адамы мемлекеттік қызмет істері жөніндегі уәкілетті органмен келісім бойынша келісімшарт бойынша қызметкердің біліктілік талаптарын бекітеді. Келісімшарт бойынша қызметкер ретінде тартылған азаматтар «Қазақстан Республикасының мемлекеттік қызметі туралы» Заңының 64-1-бабының 8-тармағында көрсетілген талаптарға және біліктілік талаптарына сәйкес келуі керек. Бұл ретте келісім-шарт бойынша жұмыс істейтін қызметкерлер мемлекеттік қызметте жұмыс істей алмайды.
Мүдделер қақтығысын болдырмау үшін жобаға тартылған мемлекеттік қызметшілердің жақын туысы, жұбайы немесе жекжасы болып табылатын азамат келісім-шарт бойынша қызметкер ретінде қабылданбайды. Мүдделер қақтығысының алдын алу және шешу, сондай-ақ оған жол бермеу жөнінде шаралар қабылдау жөніндегі міндеттер шартта белгіленеді.
Шарт бойынша жұмыскерге еңбек ақы төлеу талаптары да жұмыскердің біліктілігіне, орындалатын жұмыстың күрделілігіне, саны мен сапасына, сондай-ақ басқа да еңбек жағдайларына қарай тараптардың келісімі бойынша шартта белгіленеді. Шарттың қолданылу мерзімі белгіленген міндеттерді орындау кезеңіне белгіленеді, бірақ ұлттық және басқа да жобаларды іске асыру кезеңінде ұзарту мүмкіндігімен күнтізбелік бір жылдан аспайды. Келісімшарт бойынша жұмыс істейтін қызметкерлерге еңбекақы төлеу мемлекеттік органды ұстауға немесе жобаны іске асыруға көзделген үнемдеу есебінен жүзеге асырылады.
Келісімшарт бойынша жұмыс істейтін қызметкерге ұзақтығы 24 күнтізбелік күн болатын жыл сайынғы ақылы еңбек демалысы беріледі.
Келісімшарт бойынша қызметкер мен мемлекеттік орган арасындағы даулар Қазақстан Республикасының заңнамасында белгіленген тәртіппен шешіледі.

Қазақстан Республикасы Мемлекеттік қызмет істері агенттігінің Қостанай облысы бойынша департаментінің бас маманы Б.Оспанова