Бас Прокурор Берік Асылов инвестициялық жобалар, Активтерді қайтару комитеті және мемлекетке қайтарылған қаражаттар туралы
Инвестициялық жобаларды қолдау барысында 822 (2023 жылдан бастап – 1522) инвесторға көмектестік. Олардың инвестиция мөлшері – 8,3 трлн теңге. Жалпы, қабылданған шаралар ондаған мың жұмыс орнын құруға және сақтауға ықпал етті.
Ағымдағы жылдың басынан бастап прокуратура органдарының мобильді топтарына 800-ден аса кәсіпкер жүгінді, әрбір төртінші факті расталды.
Кәсіпкерлерден түскен шағымдардың сипаты бойынша бұл негізінен тексеру жүргізудің заңдылығы, шектеу-тыйым салу шараларын қолдану және адамдарды әкімшілік жауаптылыққа тартумен келіспеу мәселелері.
Нәтижесінде 86 қадағалау актісі енгізілді.
«Атамекен» ҰКП-мен екіжақты келісім шеңберінде прокуратура органдары бизнестің жүйелі проблемаларын шешуге белсенді қатысады (өңірлерде тоқсан сайын проблемалар тізілімі қалыптастырылады).
Инвесторларды қорғау құралдарының бірі осы жылдың бірінші тоқсанында заңнамамен бекітілген «прокурорлық сүзгі» болып отыр.
Жалпы, «прокурорлық сүзгі» инвесторларға қажетті рұқсаттарды беру тәртібін жеңілдетті және мемлекеттік органдардың шешімдер қабылдау процесінде ашықтықты қамтамасыз етті.
Әлеуметтік бағдарламаларды табысты жүзеге асыру үшін бюджетті тиімді пайдалануды қамтамасыз ету маңызды. Сондықтан біздің күш-жігеріміз мемлекетке келтірілген залалдың жолын кесуге және өтеуге бағытталған.
Атап айтқанда, Активтерді қайтару комитеті биылғы жылы 354 млрд теңгеден астам соманы қайтарды.
Қаржы төрт жүзден астам әлеуметтік объектінің құрылысына жұмсалуда. Оның ішінде шалғай елді мекендер мен қалаларда 333 объектінің құрылысы басталды. Қазірдің өзінде денсаулық сақтау және спорт салаларындағы 33 әлеуметтік нысанның құрылысы аяқталды.
Тек бюджет қаражатын жұмсау және мемлекеттік сатып алу саласында жүргізілген тексерулер мен талдаудың нәтижесінде ғана мемлекет кірісіне 5,7 млрд теңге өндіріп алынды, 259 млрд теңгеге 641 сатып алу жойылды, жауаптылықтың әртүрлі түрлеріне 1 519 адам тартылды.
Өз кезегінде, прокурорлар бюджет шығындарының алдын алу бойынша жұмысты жандандырды, қадағалауда баса назар негізсіз шығыстардың және болашақта қаражатты талан-таражға салудың алдын алуға аударылды.
Сатып алуды негізсіз жоспарлауға, сатып алу әдісінің дұрыс таңдалмауына, құнын негізсіз көтеру, тауарларды, жұмыстар мен қызметтерді артық сатып алуына назар аударылуда.
Өтінішхаттар мен наразылықтар бойынша азаматтық және әкімшілік істерге қатысты 166 сот актісінің күші жойылып, өзгертілді, 6,2 млрд теңге сомаға мемлекеттің мүдделері қорғалды.
Жалпы, прокуратураның шаралары бойынша бюджетке 716 млрд теңге өтелді (жымқырылған активтерді қайтару, прокурорлар тергеп-тексерген қылмыстық істер бойынша залал, әлеуметтік-экономикалық саладағы және атқарушылық іс жүргізудегі қадағалау актілері бойынша), қабылданған шаралар нәтижесінде бюджеттің 109 млрд теңге ықтимал шығындарына (мемлекеттік сатып алу саласында) жол берілмеді.
🌐 https://t.me/GenPr