Республика күні қарсаңында Әулиекөл ауылында «Алтын бесік» жаңа балабақшасының ашылуы өтті.

Салтанатты рәсімге Қостанай облысының әкімі Құмар Ақсақалов пен «Халық» Қорының Басқарушы директоры Нариман Әбілшайықов қатысты.

Аудан орталығында орналасқан жаңа балабақша ауданның кішкентай тұрғындары мен олардың ата-аналары үшін нағыз сыйлық болды. Осы заманауи білім беру мекемесінің құрылысы ғимаратты тұрғызуға 1,3 млрд. теңге және оны жарақтандыруға 57 млн. теңге бөлген «Халық» қайырымдылық қорының қолдауының арқасында мүмкін болды. Аумақты абаттандыру үшін облыстық бюджеттен 500 млн. теңге көлемінде қосымша қаржыландыру бөлінді.

«Бүгін біз балабақшаны ғана емес, балаларымыз үшін бүкіл әлемді ашамыз. Бұл біздің еліміздің болашағына салынған инвестиция. «Алтын бесік» қабырғасында ақылды, талантты және бақытты балалар өсетініне сенімдімін», - деп атап өтті Құмар Ақсақалов.

Ауданы 4 мың 202 шаршы метр болатын үш қабатты жаңа ғимарат 1 жастан 5 жасқа дейінгі 280 тәрбиеленушіге есептелген. Балабақшада балалардың үйлесімді дамуы үшін барлық жағдайлар жасалған: кең ойын және жатын бөлмелері, Музыка және спорт залдары, медициналық кабинет, сондай-ақ қосымша сабақтарға арналған кабинеттер. Он екі топ балалардың жас ерекшеліктерін ескере отырып жинақталады. Оқыту қазақ және орыс тілдерінде жүргізіледі.

Балабақша аумағы абаттандырылып, заманауи балалар және спорт алаңдарымен жабдықталған. Ғимарат бейнебақылау жүйесімен және өрт дабылымен жабдықталған, бұл кішкентай оқушылардың қауіпсіздігіне кепілдік береді.

«Алтын бесік» балабақшасының ашылуы мектепке дейінгі мекемелердегі орын тапшылығы мәселесін шешіп қана қоймай, өңірдегі мектепке дейінгі білім беру жүйесін дамытудағы жаңа қадам болды.