Қазақстанда мемлекеттік қызметтер жылдам әрі ашық бола түсті
Қазақстанда заңдық маңызы бар транзакциялардың цифрлық трансформациясы басталды – жылжымайтын мүлік кепілін тіркеу енді Blockchain технологиясының арқасында аз уақыт алады, деп хабарлайды Altainews.kz тілшісі.
«Азаматтарға арналған үкімет» мемлекеттік корпорациясы екінші деңгейлі банктермен бірлесе отырып, жаңа қызмет түрін – заңды тұлғалардың жылжымайтын мүлік кепілін Blockchain технологиясы арқылы тіркеуді енгізді. Бұрын үш күнге созылатын тіркеу енді бір сағатта аяқталады.
Бұл процесті толық цифрландырудың, қағаз түріндегі құжат айналымынан бас тартудың және көрсетілетін қызметті алушы мен көрсетілетін қызметті берушінің жеке өзара іс-қимылын жоюдың арқасында мүмкін болды.
Сервистің іске қосылуы Мемлекеттік корпорация мен қаржы институттары арасындағы ұзақ мерзімді ынтымақтастықтың жалғасы болды. Blockchain технологиясын енгізу қазірдің өзінде банк секторында өзінің тиімділігін дәлелдеді - ол несие беру, ауыртпалықтарды тіркеу және жылжымайтын мүлікті жалға беру процестерін жеңілдетті.
Екінші деңгейлі банктермен серіктестік аясында бүгінгі күні Blockchain көмегімен келесі қызметтер жүзеге асырылды:
- жеке тұлғалар үшін кепілдің пайда болуын және тоқтатылуын тіркеу;
- халықтың әлеуметтік осал топтары үшін мемлекеттік бағдарламалар бойынша жалдау шарттарын тіркеу;
- жылжымайтын мүлікті сатып алу-сату операциялары мен аударымдарын электрондық тіркеу;
- несиелер бойынша талап ету құқығын басқаға беруді тіркеу;
- ауыртпалықтар шарттарын өзгерту;
- тұрғын емес үй-жайдың кепілін ресімдеу.
Ыңғайлылық пен ашықтыққа ерекше назар аударылады. 2024 жылғы деректерге сәйкес, қазірдің өзінде Blockchain технологиясы арқылы 360 мыңнан астам өтінім өңделді, ауыртпалықтарды тіркеу көлемі 1,5 есеге жуық өсті: 2023 жылғы 87,8 мың транзакцияға қарсы 131,7 мың транзакция.
Жаңа технологияны қолдануда Астана, Алматы және Шымкент қалалары, сондай-ақ Ақтөбе, Түркістан, Қарағанды және Алматы облыстары барынша белсенділік танытты.
Жаңа қызмет соңғы нүкте емес, қызмет көрсету аясын кеңейтуге жасалған қадам. Жоспарларға жылжымайтын мүлікке қатысты барлық банктік келісімшарттарды электронды тіркеуге толық көшу кіреді.