Психологиялық тұрақтылық – жеке тұлға мен отбасы әл-ауқатының негізі
Қостанай облысы Полиция департаментінің мәліметінше, 2026 жылдың алғашқы бес айында өңірде отбасылық-тұрмыстық қатынастар саласында 31 қылмыс тіркелген. Бұл өткен жылдың сәйкес кезеңімен салыстырғанда 51 пайызға аз. Сонымен қатар, отбасылық-тұрмыстық құқық бұзушылықтар үшін 2,5 мыңнан астам адам әкімшілік жауапкершілікке тартылды. Бұл көрсеткіштер отбасылық қолайсыздық пен тұрмыстық зорлық-зомбылықтың алдын алу бүкіл қоғам үшін өзекті мәселе болып қала беретінін көрсетеді.
Осы тақырыпқа арналған кездесу 24 шілде күні Қостанай ауданының полиция бөлімінде өтті. Психолог Базаркүл Арыстан қызметкерлермен «Полиция қызметкерінің психологиялық әл-ауқаты – отбасылық қолайсыздық пен зорлық-зомбылықтың алдын алу факторы» тақырыбында ашық диалог өткізді.
Кездесу барысында әңгіме тек кәсіби қызметпен шектелген жоқ. Қатысушылар адамның эмоционалдық жағдайының жақындарымен қарым-қатынасына, жанжалдарды сындарлы шешу қабілетіне және отбасында сенім мен өзара құрметке негізделген ахуал қалыптастыруға қалай әсер ететінін талқылады. Мұндай құндылықтар мамандығына, жасына немесе әлеуметтік мәртебесіне қарамастан, әрбір отбасы үшін маңызды екені атап өтілді.
Талқылау барысында күйзелісті жағдайларда ішкі тепе-теңдікті сақтауға көмектесетін негізгі қасиеттер айқындалды. Олар – адамдармен тиімді қарым-қатынас жасай білу, бірін-бірі тыңдай алу, ойлау икемділігі, тұлғалық кемелдік, қалыптасқан құндылықтар жүйесі және кәсіби бірегейлік. Қатысушылардың пікірінше, психологиялық тұрақтылық адамға сабыр сақтап, эмоциясын басқара білуге, байыпты шешім қабылдауға және жұмыста да, отбасында да жанжалдардың алдын алуға мүмкіндік береді.
Кездесуде тұрмыстық зорлық-зомбылықтың алдын алу дағдарыс туындаған сәттен емес, әлдеқайда ертерек басталатыны ерекше айтылды. Сыйластыққа негізделген қарым-қатынас, эмоциялық сауаттылық, күйзеліспен күресе білу, қажет кезде психологтың көмегіне жүгіну және отбасы мүшелері арасындағы сенімді қарым-қатынасты сақтау – берекелі отбасының басты негіздерінің бірі.
Іс-шара Қостанай ауданының ішкі саясат бөлімі тапсырысы бойынша «Қостанай облысы психологтарының қауымдастығы» қоғамдық қоры жүзеге асырып жатқан тұрмыстық зорлық-зомбылықтың алдын алу және отбасылық құндылықтарды нығайту жобасы аясында ұйымдастырылды. Жоба түрлі мамандық иелері мен әлеуметтік топтарды біріктіреді, өйткені отбасылық қолайсыздықтың алдын алу – тек мамандардың ғана емес, қоғамның әрбір мүшесінің ортақ міндеті.