Адамгершілікке тексеріс: Қостанайда «Жедел жәрдемге жол бер» акциясы өтті

#ЗАҢМЕНТӘРТІП
#өмірінсақта

🚑🚨Адамгершілікке тексеріс: Қостанайда «Жедел жәрдемге жол бер» акциясы өтті

Кейде адамның бүкіл өмірі бірнеше секундқа байланысты болуы мүмкін. Қала көшелерінде арнайы жарық және дыбыс құрылғыларын қосып келе жатқанда, дәл осы бірнеше секунд үшін жедел жәрдем күреседі. Алайда күн сайын бұл көлік жолдағы кептелістен емес, жүргізушілердің жол бермегенінен бәсендеп қалады.

Қостанайда адамгершілікке тексеріс бағытында ерекше акция өтті. Жедел жәрдем көлігі қаланың адам көп жүретін көшелерімен полиция патрулі мен түсірілім тобымен бірге жүріп өтті. Мақсат — жүргізушілердің дабыл мен жарық шамдарын көргенде өздерін қалай ұстайтынын бақылау.

Өкінішке қарай, жол беруге дайын емес жүргізушілер бар екенін тексеріс нәтижесі айқындап берді. Мысалы, Seat көлігін жүргізіп келе жатқан ер адам дабыл белгісіне назар аудармады. Көлігінде аяғы ауыр жары болған, ауруханаға асыққан. Оны адами тұрғыдан түсінуге болады. Бірақ дәл осындай сәттерде тек өзін ғана емес, басқаны да ойлау қабілеті арқылы адамның кемелдігі байқалады. Полиция жүргізушімен профилактикалық әңгіме өткізді. Ол өз қателігін мойындап, «біреудің өмірін құтқаруға кедергі келтіруім мүмкін екенін түсіндім» деді.

Қостанай қалалық Полиция басқармасының патрульдік полиция батальонының аға инспекторы Талғат Аулабаев былай деді:

«Жарық және дыбыс дабылдарын қосып келе жатқан арнайы көліктерге жол бермегендерге 20 АЕК (78 640 теңге) көлемінде айыппұл қарастырылған. Егер бұл құқықбұзушылық бір жылдың ішінде қайталанса — айыппұл 40 АЕК-ке дейін өседі. Сонымен қатар, жүргізуші жол қозғалысы ережелерін қайта тапсыруға міндетті болады».

Жол бойында Daihatsu Terios көлігінің иесі тоқталды. Ол полиция көлігінің алдын кесіп өтіп, жол-көлік оқиғасын болдыра жаздады. Абырой болғанда, ешкім зардап шеккен жоқ.

Бүгінгі таңда Қостанай облысында 56 жедел жәрдем бригадасы жұмыс істейді, соның 18-і Қостанай қаласында. Олар тәулігіне мың шақыртуға барады. Әр жолы жабық аула немесе жүргізушілердің жол бермеуі секілді сәттер кедергі келтіріп, бағалы уақыт жоғалады. Ал уақытпен бірге біреудің өмірі де кетуі мүмкін.