КЕНЕ МАУСЫМЫ: ҚОРҒАНУДЫҢ ҚАРАПАЙЫМ ҚАДАМДАРЫ

Күн жылынған кезде кенелердің белсенділігі артады. Кенелер — қауіпті жұқпалы ауруларды тасымалдауы мүмкін ұсақ паразиттер. Олардың ішінде ең кең таралғандары — кене энцефалиті мен Лайм ауруы (боррелиоз). Табиғат аясында демалу, саяжайда жұмыс істеу және орманды немесе саябақ аймақтарына бару кезінде алдын алу шараларын сақтау өте маңызды.

Кенелер көбінесе биік шөптерде, бұталардың арасында және орман төсенішінде кездеседі. Адамның киіміне жабысып, ұзақ уақыт байқалмай қалуы мүмкін. Кене шаққан кезде ауырсыну сезілмейтіндіктен, оны бірден анықтау әрдайым мүмкін бола бермейді.

Кене шағу қаупін азайту үшін келесі қарапайым сақтық шараларын сақтау қажет:

• табиғатқа шыққанда ашық түсті, жабық киім киіңіз;
• шалбардың балағын шұлықтың немесе аяқ киімнің ішіне салыңыз;
• бас киім қолданыңыз;
• арнайы қорғаныш құралдарын — репелленттерді пайдаланыңыз;
• биік шөптер мен қалың бұталардың арасында жүрмеуге тырысыңыз;
• серуеннен кейін киім мен денені мұқият тексеріңіз;
• үй жануарларын серуеннен кейін қарап шығыңыз.

Балаларға ерекше көңіл бөлу қажет, себебі олар шөптің арасында жиі ойнайды және кене жабысқанын байқамауы мүмкін.

Егер кене анықталса, оны өз бетінше жұлып алуға болмайды. Мүмкіндігінше тезірек медициналық көмекке жүгіну қажет. Дереу дәрігерге қаралу мүмкін болмаса, кенені денесін зақымдамай абайлап алып тастап, шаққан жерді антисептикпен өңдеу керек.

Кене шаққаннан кейін денсаулық жағдайын бақылау маңызды. Дене қызуының көтерілуі, әлсіздік, терінің қызаруы немесе басқа белгілер пайда болған жағдайда дереу дәрігерге қаралу қажет.

Алдын алу шараларын сақтау денсаулықты қорғауға және табиғаттағы демалысты қауіпсіз етуге көмектеседі.