ҚР Президентінің кеңесшісі М.Н. Отарбаевтың Қостанай облысына жұмыс сапары.

28-29 қазан күндері ҚР Президентінің кеңесшісі М.Н.Отарбаев өңірге жұмыс сапарымен келіп, Мемлекет басшысының Жолдауында айқындалған міндеттердің орындалу барысымен танысты.

Облыс әкімі Қ.І.Ақсақаловтың қатысуымен аудан, ауылдық округтер және ауыл әкімдерімен кездесіп, Президент Жолдауының негізгі бағыттарын түсіндірді.

Зұлқарнай Алдамжар атындағы Қостанай әлеуметтік-техникалық университетінде жастармен кездесіп, еліміздің болашағы саналатын жас ұрпақтың белсенділігі мен бастамашылдығына ерекше назар аударды. Сондай-ақ студенттердің қатысуымен өткен мерекелік концертті тамашалады.

Көрнекті ағартушы, ұлт қайраткері Міржақып Дулатұлы ескерткішіне гүл шоқтарын қойып, рухына тағзым етті.

Алтынсарин ауданының тұрғындарымен жүздесіп, олардың ұсыныс-пікірлерін тыңдады.

М.Н.Отарбаевтың сапары халықпен тікелей байланыс орнатуға, Президент бастамаларының жергілікті деңгейде жүзеге асуын нақты талқылауға бағытталды.