Жұмыс берушілер тарапынан еңбек заңнамасы талаптарының бұзылуын болдырмау жолдары

2021 жылдан бастап HR.enbek.kz порталында «Онлайн еңбек консультанты» сервисі жұмыс істейді. Ол әрбір жұмыс берушіге еңбек заңнамасы талаптарының сақталуы бойынша өзін-өзі алдын ала тексеруге мүмкіндік береді.
Өзін-өзі тексеруден өту үшін «Онлайн еңбек консультанты» жүйесінде тіркелу талап етілмейді. Ресурс ұйымның нақты атауын, дербес деректерді сұрамайды және толық анонимді болып табылады. Тексеруден кез-келген шартты атауды енгізу арқылы өтуге болады.
Сервис жұмыс берушілерге еңбек заңнамасының қыр-сырын түсінуге арналған, сондай-ақ ұйымның құжаттамасы құқықтық нормаларға сәйкес келетіндігін анықтауға көмектеседі.
Тексеру аяқталғаннан кейін жүйе жауаптарды талдап, сәйкессіздіктер тізімі көрсетілген қорытынды жасайды немесе өзін-өзі тексерудің сәтті өткенін хабарлайды.
Егер еңбек заңнамасы бойынша бұзушылықтар анықталса, жұмыс берушіге оларды жою үшін ұсынымдар берілетін болады. Бұзушылықтар жойылғаннан кейін өзін-өзі тексеруден қайта өтуге болады.