Кітапханадағы ашық есік күні

Кітапханадағы ашық есік күні — кітапты, білімді және жанды қарым-қатынасты сүйетін жандар үшін ерекше мереке. Бұл күні кітапхана тек әдебиет сақтайтын орын ретінде ғана емес, сонымен қатар кездесулерге, жаңа ашылымдарға және шабыт алуға арналған мәдени кеңістік ретінде өз есігін айқара ашады. Қонақтар кітапхана қорымен танысып, оның мүмкіндіктері туралы мағлұмат алып, кітапхананы қоғамның мәдени өмірінің маңызды бөлігіне айналдыратын жайлы әрі зияткерлік диалог атмосферасын сезіне алды.

Бүгін, 28 қаңтар күні, кітапхана қабырғасында «Кітаптар мекенінің есігі ашық» атты символдық атаумен Ашық есік күні өтті. Іс-шараның басында ОКЖ басшысы Гаухар Жақсылыққызы Асанова құттықтау сөз сөйледі. Одан кейін кітапханашы Нина Олеговна Корякина қонақтарды кітапхана үшін маңызды даталар мен елеулі оқиғалармен таныстырды.

Іс-шараның бірінші бөлімінде Саин Мұратбеков, Марфуға Айтқожина, Олжас Сүлейменов, Мұқағали Мақатаев, Иван Шухов сынды қаламгер-жазушылардың мерейтойларына арналған тақырыптық сөрелер ұсынылды. Қонақтардың ерекше қызығушылығын Жамбыл Жабаевтың туғанына 180 жыл толуына арналған «Жамбыл Жабаев: ұлы ақынның мұрасы» атты кең көлемді кітап көрмесі тудырды. Көрмеде ақынның көркем шығармаларымен қатар, оның өмірі мен шығармашылық жолын баяндайтын еңбектер де қойылды. Сондай-ақ кітапхана қорында 1938 жылы жарық көрген, былғары мұқабада сақталған «Жамбыл» атты сирек басылымның бар екендігін ерекше атап өткен жөн. Бұл құнды жәдігер бүгінгі күнге дейін жақсы күйде сақталып, зор тарихи әрі мәдени маңызға ие.

Оқу залына өткен қонақтар Дина Нұрпейісова, Ахмет Жұбанов және жерлесіміз Ыбырай Алтынсарин сынды мерейтой иелеріне арналған шолумен танысты. Сонымен қатар, биылғы маңызды даталардың бірі — «Алаш» партиясының негізін қалаушы, ұлттық тәуелсіздік идеясының қалыптасуына зор үлес қосқан Әлихан Бөкейханның туғанына 160 жыл толуына ерекше назар аударылды. Тәуелсіздік тақырыбын жалғастыра отырып, еліміздің дербес мемлекет ретінде қалыптасуының 35 жылдығына арналған кітап көрмесі ұсынылды. Экспозицияда Қазақстан Республикасының мемлекеттік рәміздері, ұлттық валютасы, Ата Заңы, сондай-ақ еліміз тарихындағы маңызды кезең — астананың Алматы қаласынан Астанаға көшірілуі туралы материалдар қамтылды.

Іс-шара соңында Нина Олеговна Қостанай облысының 90 жылдығы мен ауданымыздың 90 жылдығына арналған кітап көрмесін таныстырды. Бұл көрме туған өлкенің бай да мазмұнды тарихын бейнелейтін өзіндік шежіреге айналды. Ұсынылған әдебиеттерде өңір мен ауданның қалыптасу кезеңдері, маңызды тарихи оқиғалар, әлеуметтік-мәдени және еңбек жетістіктері кеңінен баяндалған. Сондай-ақ туған жерінің өркендеуіне адал еңбегімен үлес қосқан, ауданымызды ғана емес, бүкіл елімізді танытқан азаматтар туралы деректерге ерекше орын берілген. Көрме қонақтардың зор қызығушылығын тудырып, тарихи жадымызды сақтау мен ұрпақтар сабақтастығының маңызын терең сезінуге мүмкіндік берді.

Іс-шараның екінші бөлімінде библиограф Светлана Николаевна Король қонақтарды «2026 жылдың атаулы және естелік күндер күнтізбесімен» таныстырды. Шолу барысында ол ауданымыздың мерейтой иелері болған көрнекті тұлғалар, сондай-ақ маңызды ғимараттар мен мекемелердің ашылған күндері туралы мәлімет берді. Ұсынылған күнтізбе қатысушылардың қызығушылығын тудырып, алдағы мәдени-ағартушылық жұмыстарды жоспарлауда, естелік күндерді тиімді пайдалануда маңызды бағыт-бағдар болды.