ҚР Ауыл шаруашылығы вице-министрі А.С. Сұлтанов Қостанай облысының аграршыларымен кездесті

Ағымдағы жылдың 28 мамырында Қазақстан Республикасы Ауыл шаруашылығы Вице-министрі Азат Сұлтанов Қостанай облысындағы есеп берудің кездесу барысында аграршылармен агроөнеркәсіп кешенін мемлекеттік қолдаудың негізгі бағыттарын талқылады. Кездесуде ҚР АШМ-нің фермерлермен ашық диалог орнатуына және ауыл шаруашылығы өнімдерін өндіру көлемін екі есеге арттыру жөніндегі стратегиялық міндетті іске асыруға ерекше назар аударылды.

Кездесу барысында айтылған негізгі мәселелер мен саланың қазіргі көрсеткіштері:

• 2025 жылдың қорытындысы бойынша АӨК-нің жалпы өнімінің көлемі 5,9%-ға өсті  (9,8 трлн теңгеге дейін).
• 2026 жылы Қазақстандағы жалпы егіс алқабы 23,8 млн гектарға дейін ұлғаяды (оның ішінде Қостанай облысында — 5,5 млн гектарға дейін). Бұл ретте бидай секілді монодақылдардың егіс көлемі кезең-кезеңімен қысқартылып, сұранысқа ие майлы және мал азықтық дақылдарға басымдық беріледі.
• Көктемгі егіс және егін жинау жұмыстарын жүргізу үшін қаржыландырудың 6 арнасы арқылы қарыз алушыларға жылдық таза 5% мөлшерлемемен 750 млрд теңге бөлінді. Қостанай облысында бүгінде 491 фермер жалпы сомасы 46,6 млрд теңге болатын жеңілдетілген несие алды.
• 2026 жылы ауыл шаруашылығы техникасын жеңілдетілген лизинг арқылы қаржыландыру бағдарламасының көлемі 300 млрд теңгеден асады. Қостанай облысынан жалпы сомасы 49 млрд теңгеге 351 өтінім түсті.
• Жаңа қозғаушы күш — Мал шаруашылығы: Саланы дамытудың кешенді жоспары аясында (жалпы бюджеті 400 млрд теңгеден астам) асыл тұқымды мал сатып алуға арналған жылдық 6% мөлшерлемемен қолжетімді «Игілік» және «Береке» несиелері іске қосылды. Мемлекет әрбір мал басына 525 мың теңге субсидия беріп, оның нарықтық құнын толық өтейді. Сонымен қатар 15 мамырдан бастап бордақылау алаңдары мен құс фабрикаларына айналым қаражатын беру бойынша өтінім қабылдау қайта басталды (жылдық 5%).
• СҚО тәжірибесін тарату бағдарламасы аясында Қостанай облысына 9 млрд теңге бөлінді (оның ішінде 2 млрд теңге балық питомнигін, тауарлы сүт фермасын және ірі көкөніс қоймасын салуға бағытталды). Жалпы 2026–2028 жылдары өңірде жалпы құны 553,1 млрд теңге болатын 42 инвестициялық жобаны іске асыру жоспарланған.
• 2026 жылы Қостанай облысына бөлінетін субсидия көлемі екі есеге жуық өсіп, шамамен 85 млрд теңгені құрады.

Сондай-ақ талқылау барысында А.С. Сұлтанов ауыл шаруашылығы тауарын өндірушілердің жүйелі сауалдарына жауап берді.