Қостанай облысының мемлекеттік архивінде Валерий Алексеевич Цхайды еске алу кеші өтті

2026 жылғы 22 мамырда Қостанай облысының мемлекеттік архивінің конференц-залында көрнекті хирург, Қостанай қаласының Құрметті азаматы, Қазақстан Республикасының «Жыл дәрігері», Қостанай меценаттар клубының «Ғылым» номинациясы бойынша «Қазына» сыйлығының лауреаты Валерий Алексеевич Цхайдың 85 жылдығына арналған еске алу кеші өтті.

Іс-шара Қостанай облысының денсаулық сақтау саласы мен отандық медицинаның дамуына зор үлес қосқан тұлғаның жарқын бейнесін ұлықтау және оның мұрасын кейінгі ұрпаққа насихаттау мақсатында ұйымдастырылды. Кешке мемлекеттік және қоғамдық ұйымдардың өкілдері, әріптестері, достары, туыстары, Қостанай облысының мемлекеттік архивінің қызметкерлері қатысты.

Кездесу барысында қатысушылар Валерий Алексеевичтің өмір жолы мен кәсіби қызметін еске алды. Оның еңбек жолы Қостанай облыстық ауруханасымен тығыз байланысты болды. Қарағанды мемлекеттік медицина институтының емдеу факультетін тәмамдағаннан кейін, 1964 жылдан бастап дәрігер-торакальды хирург болып қызмет атқарды. Ал 1974 жылдан 2011 жылға дейін кеуде және қан тамырлары хирургиясы бөлімшесінің меңгерушісі болды.

Валерий Алексеевичтің жетекшілігімен бөлімше өңірдегі алдыңғы қатарлы медициналық орталықтардың біріне айналып, диагностика мен емдеудің озық әдістерін енгізді. Оның ғылыми мұрасы кеуде хирургиясының өзекті мәселелеріне арналған 100-ден астам ғылыми жарияланымды қамтиды. Дәрігердің кәсіби жетістіктері көптеген дипломдармен, грамоталармен және патенттермен марапатталып, Қазақстанда ғана емес, шетелдерде де жоғары бағаланды.

Еске алу кеші аясында Валерий Алексеевич Цхайдың өмірі мен еңбек жолын бейнелейтін архивтік құжаттар, фотосуреттер мен басқа да материалдар көпшілік назарына ұсынылды. Қатысушылар оның жоғары кәсібилігін, өз ісіне адалдығын, адамгершілік қасиеттерін және пациенттерге деген қамқор көзқарасын ерекше атап өтті.

Еске алу кеші көрнекті дәрігерге, ғалымға және қоғам қайраткеріне көрсетілген зор құрметтің белгісі болды. Валерий Алексеевич Цхайдың есімі Қостанай облысының тарихында мәңгі сақталады.