«НАЗАР АУДАРЫҢЫЗ! ШАҒЫН ФЛОТ!» науқаны аясында мыңға жуық құқықбұзушылық анықталды

Автомобиль көлігі және көліктік бақылау комитеті жаз бойы жүргізілген республикалық «НАЗАР АУДАРЫҢЫЗ! ШАҒЫН ФЛОТ!» науқанын қорытындылады.

Акция мақсаты — су айдындарындағы қауіпсіздікті арттыру.

Комитеттің аумақтық бөлімдері  2701 шағын кемені тексеріп, 986 әкімшілік құқықбұзушылықты анықтады.

Ең көп тіркелген құқықбұзушылықтар қатарында:

• кеме жүргізушілері мен жолаушылардың құтқару жилеттері мен белдіктерінің болмауы – 344 жағдай;
• шағын кемелерді пайдалану ережелерін бұзу – 220 жағдай;
• кемені жүргізуге арнайы рұқсаты жоқ тұлғалардың басқаруы – 101 жағдай;
• жылдамдықты асыру – 129 жағдай;
• қоқысты суға лақтыру – 83 жағдай;
• шағын кеме құжаттарының болмауы – 32 жағдай.

Жазғы маусым басталғанға дейін барлық өңірлерде алдын алу шаралары өткізілді. Мамандар шағын кеме және тұрақ-базаларының иелерімен кездесулер, демалыс аймақтарында түсіндіру жұмыстарын өткізіп, азаматтарға кемелерді қауіпсіз пайдалану жөніндегі заңнамалық талаптар туралы айтты.

Шағын кемелерді пайдалану ережелерін сақтау – адамдардың өмірі мен денсаулығының қауіпсіздігінің кепілі. Ведомство кеме жүргізушілерін заң талаптарына жауапкершілікпен қарауға шақырады.