NAQTY ONIM: дәрілік заттарды тексеруге және бағасын бақылауға мүмкіндік беретін цифрлық сервис
Қазақстанда азаматтарға дәрілік заттарды өз бетінше тексеруге, олардың таңбалануы мен қозғалысы туралы ақпарат алуға, сондай-ақ белгіленген шекті бағалардың сақталуын бақылауға мүмкіндік беретін NAQTY ONIM цифрлық сервисі жұмыс істейді.
Қосымша тауарларды цифрлық таңбалау және қадағалаудың мемлекеттік жүйесі аясында әзірленген. Оны пайдалану фармацевтикалық нарықтың ашықтығын арттыруға және тұтынушылардың құқықтарын қорғауға қосымша мүмкіндік береді.
Дәрілік затты қалай тексеруге болады?
2024 жылғы 1 шілдеден кейін өндірілген дәрілік заттардың қаптамасында бірегей Data Matrix коды болады.
Препаратты тексеру үшін смартфондағы NAQTY ONIM қосымшасын ашып, камера арқылы осы кодты сканерлеу қажет.
Сканерлегеннен кейін пайдаланушы дәрілік зат туралы, оның ішінде мынадай ақпараттарды көре алады:
- дәрілік заттың атауы;
- өндіруші туралы мәлімет;
- тіркеу деректері;
- таңбалау мәртебесі;
- препараттың заңды түрде айналымға шығарылғанын растайтын ақпарат;
- дәрілік заттың жеткізу тізбегі бойынша қозғалысы туралы мәлімет.
Цифрлық таңбалау дәрілік заттың өндірушіден немесе импорттаушыдан бастап дистрибьюторға, дәріханаға және соңғы сатып алушыға дейінгі қозғалысын бақылауға мүмкіндік береді.
Дәрі-дәрмектің бағасын қалай тексеруге болады?
Қосымшаның тағы бір маңызды мүмкіндігі – дәрілік заттардың бағасын тексеру.
Пайдаланушы дәріге мемлекет белгілеген шекті бөлшек бағаны көріп, оны дәріханадағы нақты бағамен салыстыра алады.
Егер дәрінің бағасы белгіленген шекті деңгейден жоғары болса, азамат бұл туралы цифрлық сервистер арқылы хабарлап, ақпаратты одан әрі қарау үшін уәкілетті органдарға жібере алады.
Азаматтардың бақылауға қатысуы
NAQTY ONIM азаматтарға сатып алатын дәрілік зат туралы ақпаратты өз бетінше алуға және ықтимал заң бұзушылықтар туралы хабарлауға мүмкіндік береді.
Мұндай цифрлық құралдар мемлекеттік бақылауды толықтырып, дәрілік заттарды белгіленген талаптарды бұза отырып сату жағдайларын дер кезінде анықтауға ықпал етеді.
Цифрлық таңбалау не үшін қажет?
Цифрлық таңбалау және қадағалау жүйесі:
- дәрілік заттардың жеткізу тізбегіндегі қозғалысын бақылауға;
- заңсыз айналымдағы өнімді анықтауға;
- қолдан жасалған және контрафактілік дәрілік заттардың айналымына байланысты тәуекелдерді азайтуға;
- дәрілік заттарды өткізу кезінде белгіленген талаптардың сақталуын бақылауға;
- азаматтардың дәрілік заттар туралы ақпараттануын арттыруға мүмкіндік береді.
NAQTY ONIM-ді пайдалану арқылы сатып алушы дәрілік затты сатып алмас бұрын оның таңбалануын тексеріп, препарат туралы қажетті ақпаратты ала алады.
Медициналық және фармацевтикалық бақылау комитеті дәрілік заттарды бақылауға арналған цифрлық құралдарды жетілдіру және азаматтар үшін қажетті ақпараттың қолжетімділігін арттыру бойынша жұмысты жалғастыруда.