Желшешектің алдын алу

Желшешек – қызба, интоксикация және дақ-везикулозды бөртпелермен сипатталатын өткір жұқпалы ауру. Ауру ауа тамшылары арқылы беріледі.

Инфекция көзі – инкубациялық кезеңнің соңынан бастап қыртыстың түсуіне дейін эпидемиялық қауіп төндіретін науқас адам. Желшешектің инкубациялық кезеңі 21 күнді құрайды. Негізінен 6 айдан 7 жасқа дейінгі балалар ауырады.

2022 жылы Ақтөбе облысы бойынша желшешек ауруының 5280 жағдайы тіркелді (АК – 579,38), ал 2021 жылы – 2386 жағдай (АК – 267,34). Өткен жылмен салыстырғанда аурушаңдық 2,2 есе көбейгені байқалады.

14 жасқа дейінгі балалар арасында 5141 жағдай (АК – 1910,0), 2021 жылдың ұқсас кезеңінде – 2199 жағдай (АК – 856,20). Ауырған 14 жасқа дейінгі балалардың үлес салмағы 97,4%.

Айналасындағылар үшін науқас бөртпе пайда болғанға дейін 2 күн бұрын және одан кейін тағы бір апта бойы жұқпалы болады. Инфекция әдетте жеңіл ыстықтан (қызба, орташа температура 38-39°C) және әлсіздіктен басталады. Желшешектің температурасы толқынды түрде көтерілуі мүмкін: алғашқы бөртпелер алдында, жаңалары кезінде және бөртпелердің бүкіл кезеңінде болуы мүмкін. Бір күннен кейін бөртпе пайда болады, алдымен денеде, қолда, аяқта және бетте кішкентай қызыл дақтар пайда болады. Көп ұзамай дақтар тығыздалады, ісінеді және сұйықтыққа толып, көпіршіктер пайда болады. Сонымен қатар, бала қарқынды қышуды сезінеді, нәтижесінде ол үнемі зақымдалған теріні қасуға тырысады.

Желшешектің алдын алу үшін мыналарды ұсынамыз:

- науқас пен оған күтім жасайтын адамдар жеке гигиена қағидаларын қатаң сақтауы керек, науқаспен байланыста болғаннан кейін қолды мұқият жуу;

- ылғалды тазалау жүргізе отырып, үй-жайды үнемі желдетіп отыру;

- жатып демалу режимін сақтау;

- құрамында С дәрумені бар тағамдарды тұтыну.