Түркістан облысының эпидемиологтары COVID-19-ға қарсы күрес жұмыстарын күшейтуде

Түркістан облысы Ордабасы, Бәйдібек және Отырар аудандық санитарлық эпидемиологиялық бақылау басқармаларының  мамандары мен аудандық аурухана қызметкерлері коронавирус инфекциясына қарсы күрес жұмыстарын одан әрі күшейту үстінде. Індетті ауыздықтаудың ауыр салмағы дәл осы екі  сала мамандарына түсетіні анық. Инфекцияның таралуына жол бермеу мақсатында эпидемиологтар мен инфекционист дәрігерлер онлайн режимде өзекті сұрақтарына жауап алып, өзара тәжірибе алмасуда. 

Өңірде медбикелер үшін де «COVID-19 инфекциясына шалдыққан науқастарға мейірбикелік көмек» тақырыбында арнайы оқу-сабақтары өткізілді. Онлайн режиміндегі семинарларға түрлі бейіндегі 200-ге жуық орта медициналық қызметкерлер қатысқан. Оқыту барысында дәріскерлер емдік шаралары, инфекциялық қауіпсіздік мәселелері, оның ішінде биоқауіпсіздік, орта медициналық персонал деңгейінде инфекциялық бақылауды жүргізуді қамтамасыз ету мәселелерін қамтыды.

Соңғы тәулікте коронавирус инфекциясын жұқтырған 5 жағдай тіркелді. Инфекциялық стационарларда 7 азамат коронавирус инфекциясынан және 30 адам COVID-19 белгілері бар пневмониядан ем қабылдауда. Өңірде пандемия басталғалы COVID-19 расталған 3 454 науқас бойынша 2668 ошақ анықталып, барлығында дезинфекциялық, эпидемияға қарсы іс-шаралар жүргізілді. Науқастардың 3374-і яғни, 98% пайыздан астамы жазылып шыққан.