Қызылорда облысында үш теміржол вокзалын қайта жаңғырту жұмыстары аяқталды

Қызылорда облысында Жосалы, Төретам жәнеАрал теңізі станцияларының вокзалдарын қайта жаңарту аяқталды. Жұмыстар Мемлекет басшысының тапсырмасы бойынша еліміздің теміржол вокзалдарын жаңғырту бағдарламасы аясында жүргізілді.

Барлық үш нысанда қасбеттер, шатырлар, ішкіүй-жайлар, инженерлік жүйелер, перрондар және іргелес аумақтар жаңартылды. Энергия үнемдейтін терезелер мен алюминий витраждар орнатылып, вокзалдарға қажетті жабдықтар мен жиһаздар орнатылды. Әрлеу кезінде отандық өндірістің сұранысқа сай материалдары пайдаланылды.

Жосалы станциясының екі қабатты вокзалы 1905 жылы салынған. Ғимарат ауданы 628,8 шаршы метрді құрайды. Станция арқылы Жосалыны Қазақстанның ірі қалаларымен, сондай-ақ Ресеймен, Өзбекстанмен және Қырғызстанмен байланыстыратын 22 жолаушылар пойызы өтеді.

Төретам станциясында ауданы 628,8 ш. м. екі қабатты вокзал ғимараты қайта жаңартылды. Орташа тәуліктік жолаушылар ағыны 340 адамнан асады. Станция арқылы 22 жолаушылар пойызы өтеді.

1904 жылы салынған Арал теңізі станциясының вокзалы қайта жаңартудан кейін 439,8 шаршы метрге дейін ұлғайтылды. Орташа тәуліктік жолаушылар ағыны 640 адамнан асады. Станция арқылы Аралды Қазақстан қалаларымен және көрші елдермен байланыстыратын 24 жолаушылар пойызы өтеді.

Қызылорда облысында Тереңөзек және Жалағаш станцияларының вокзалдарын жаңарту жалғасуда.