Жаңа салық кодексіне арнаулы салық режимі бойынша түзетулер

     Жаңа Салық кодексінде арнаулы салық режимдерін оңтайландыру көзделген.

     Негізгі мақсат – салық жүйесін азаматтар мен бизнес үшін барынша қарапайым, қолайлы және қолжетімді ету.

     Негізгі өзгерістер:

• қайталануды болдырмау үшін режимдерді қысқарту және біріктіру;
• өзін-өзі жұмыспен қамтығандарға арналған жаңа режимді енгізу;
• шағын және орта бизнес үшін жағдайларды жақсарту;
• аграрлық секторға арналған режимдерде көзделген қолданыстағы салықтық жеңілдіктерді сақтау.

      Өзін-өзі жұмыспен қамтығандар үшін

      Азаматтардың кірістерін заңдастыруға және олардың салықтық жүктемесін барынша азайтуға мүмкіндік беретін өзін-өзі жұмыспен қамтығандарға арналған АСР енгізіледі::

• жеке кәсіпкер ретінде тіркелу талап етілмейді;
• табыс салығының мөлшерлемесі – 0%;
• тек әлеуметтік төлемдер – табыстан 4%;
• міндеттемелерді мобильді қосымша арқылы ыңғайлы орындау;
• интернет-платформалар арқылы алынған табыстар бойынша әлеуметтік төлемдерді ұстап қалуды және аударуды интернет-платформа операторлары жүзеге асырады.

      Шағын және орта бизнес үшін

      Оңайлатылған декларация негізіндегі АСР жақсартылған шарттармен сақталады:

• табыс шегінің ең жоғарғы мөлшері 2,5 млрд теңгеге дейін ұлғайтылады;
• қызметкерлер санына шектеу жоқ;
• бірыңғай салық мөлшерлемесі – 4%, мәслихаттарға 2%-ға азайту/арттыру құқығы беріледі;
• ҚҚС және әлеуметтік салықтан босатылады;
• есептілік – жылына екі рет қана.

      Аграрлық сектор үшін

      Бірыңғай жер салығының жойылуына байланысты, АСР-ды қолданған шаруа немесе фермер қожалықтары бұрынғы шарттарда және сол мөлшерлемелер бойынша жеке табыс салығын төлейтін болады.

     Жеке салықтар бойынша 70% жеңілдігі бар субъектілер үшін бұл жеңілдіктер жалпыға бірдей белгіленген тәртіпте сақталады.

      Осылайша, жаңа Салық кодексімен режимдерді қолдану кезінде міндеттемелерді орындаудың ашық әрі қарапайым қағидалары құрылды, бизнеске түсетін жүктеме азайтылды, өзін-өзі жұмыспен қамтығандарды қолдау тетіктері енгізілді және аграршылар үшін қолданыстағы жеңілдіктер сақталды.