Қазақстанда 9-11 (12) сынып оқушыларына арналған республикалық олимпиаданың қорытынды кезеңі басталды

Оқу-ағарту министрлігінің «Дарын» республикалық ғылыми-практикалық орталығы 2026 жылғы наурыз-сәуір айларында 9-11 (12) сынып оқушыларына арналған республикалық олимпиаданың IV (қорытынды) кезеңін өткізеді. 2026 жылғы олимпиаданың қорытынды кезеңі еліміздің 6 қаласында 15 пән бойынша өтеді және оған республика өңірлерінен іріктелген 1636 дарынды оқушы бақ сынайды.

Олимпиаданың мақсаты – дарынды оқушылардың шығармашылық қабілеттерін дамыту, теориялық білім мен практикалық дағдыларын тереңдету, жеке тұлғаның өзін-өзі жүзеге асыруына жағдай жасау, халықаралық олимпиадаларға дайындау және Қазақстан білім жүйесінің беделін арттыру.

Жалпы білім беретін пәндер бойынша республикалық олимпиада төрт кезеңнен тұрады.
Бірінші (мектепішілік) кезеңге 7 211 білім беру ұйымынан 358 146 оқушы;
Екінші (аудандық) кезеңге 6316 ұйымнан 135670 оқушы;
Үшінші (облыстық) кезеңге 3236 ұйымнан 18127 оқушы қатысса, ал төртінші (қорытынды) кезеңге республиканың барлық өңірлерінен, сондай-ақ республикалық білім беру ұйымдарынан («РФММ» КеАҚ, Абай Ұлттық мектебі және «Назарбаев Зияткерлік мектептері» ДББҰ) 1636 оқушы қатысады деп жоспарлануда. Олардың 73-і – республикалық ауыл олимпиадасының жеңімпаздары, жаратылыстану-математикалық бағыты бойынша – 930 оқушы, қоғамдық-гуманитарлық бағыт – 706 оқушы).

Барша қатысушыларға сәттілік тілейміз!