Бүгін ҚР Премьер-Министрі Бақытжан Сағынтаев Kazakhstan Global Investment Roundtable екінші халықаралық дөңгелек үстелінің жұмысына қатысты. Шараның басты мақсаты — Қазақстанның инвестициялық мүмкіндіктерін таныстыру, инвестициялар, экономикалық даму және бәсекеге қабілеттілікті арттыру саласындағы саясатты талқылау.

KGIR-2018-ге әлемнің 40 елінен 550 ірі бизнесмен мен инвесторлар қатысуда (Ұлыбритания, Германия, Франция, Түркия, БАӘ, Катар, ҚХР және т.б.). 

Форумда жекешелендіру, агроөнеркәсіп секторын дамыту, цифрландыру, энергетика, машина жасау, инфрақұрылым және логистика секілді экономика салаларына инвестиция салу саясаты талқылануда.

Қазақстан Премьер-Министрі пленарлық отырысты аша отырып, инвестициялық заңнаманы жақсарту шетелдік инвесторларға Қазақстан экономикасына жаңаша көзқараспен қарауға мүмкіндік беретінін атап өтті.

Street Signs бағдарламасының тең-жүргізушісі Ориэль Моррисон шара модераторы болды. Талқылау барысында Б. Сағынтаев халықаралық компаниялар неліктен Қазақстан экономикасына инвестиция салуы керек екеніне жауап берді.

«Қазақстан Үкіметі инвесторлар үшін және олардың елімізде табысты жұмыс істеуі үшін барлық жағдайды жасап жатыр. Инвесторларымыз өздерін сенімді сезінуіне мүмкіндік бердік. Еліміздегі инвестициялардың қорғалуына кепілдік береміз. Біздің стратегиялық мақсатымыз – 2050 жылға қарай озық дамыған 30 елдің қатарына кіру. Осы мақсатқа жету үшін біз инвесторлармен бірге алға қадам басуымыз керек», — деді ҚР Премьер-Министрі.

Сондай-ақ, Б. Сағынтаев инвесторларды өңдеу секторына инвестициялар салуға шақырды. Индустриялық-инновациялық даму бағдарламасының бірінші бесжылдығын іске асыру жылдарында елімізде шамамен 3 мың жаңа кәсіпорын салынды. Қазірдің өзінде отандық қайта өңдеу өнімдері $15 млрд жеткізіледі.

Әңгімелесу барысында форум қатысушылары инвестициялық саладағы ынтымақтастықты одан әрі дамыту мәселелерін қарады. Шетелдік инвесторлар Қазақстанда бизнесті жүргізу және ұйымдастыру туралы өз көзқарастарымен бөлісті: қазақстандық жобаларға инвестициялар салу қаншалықты тартымды бола бастағынан айтты.

Сонымен қатар, SUN Group басқарма төрағасының орынбасары Шив Хемка Қазақстанның инвестициялық ахуалының жақсару динамикасы туралы айтып берді.

«Қазір біз жаңа дәуірді көріп отырмыз. Мемлекет басшысын және Қазақстан Үкіметін сәтті даму тарихымен құттықтаймын. Ақмолаға алғаш рет 1996 жылы келдім, ол кезде шағын қала болды. Бүгін мен мүлдем өзгеше Астананы, мүлдем жаңа қаланы көріп тұрмын. Қазақстан Үкіметі инвесторлар үшін жағдайды барынша жеңілдету үшін үлкен күш-жігер жұмсағаны байқалады. Жүйелі өзгерістер мүмкіндіктерін үнемі іздейді, мемлекеттік органдармен өзара әрекеттесу әлдеқайда оңтайландырылды. Мемлекеттік органдармен ынтымақтасу айтарлықтай жеңілдеді», — деді Шив Хемка.

Өз кезегінде, «РОТЕК» АҚ директорлар кеңесінің төрағасы Михаил Лифшиц Қазақстандағы бизнес ахуал өте жағымды және қазақстандық тараппен жұмыс істеу жылдан-жылға өте ыңғайлы болып келе жатқанын атап өтті. 

«Қазақстанда 50 жуық біздің турбиналарымыз жұмыс істейді және біз 15% жуығын қамтимыз. Бұл көлемнен соңғы 10 жылда 18 жобаны іске асырдық, бұл біздің инвестицияның салынуына қызығушылығымыздың бар екенін нақтылайды. Жалпы, Қазақстанда жұмыс істеу өте қолайлы және бұл шындық», — деді М. Лифшиц.

UAE International Investors Counsil БАӘ Халықаралық инвесторлар кеңесінің бас хатшысы Жамал Саиф әл-Жарван Қазақстанның инвестициялар тартуға көп көңіл бөліп отырғанын айтты. Елдер екіжақты келісімдерге қол қойды, соның арқасында БАӘ инвесторлары Қазақстанда жұмыс істей алады. 

Пленарлық отырыс барысында сонымен қатар Renaissance Capital бас экономисі Чарльз Робертсон, IHS Markit вице-төрағасы Даниэль Ергин және т.б. сөз сөйледі. 

Форум сегіз тақырыптық сессия форматында жалғастырылды: 

• «Әртараптандырылушы экономика үшін жаңа нарықтар құру», 

• «Еуразиялық аймақтың логистикалық әлеуеті», 

• «Қазақстанда жекешелендіру бағдарламасының тиімділігін арттыру», 

• «Қазақстанның энергетикалық әлеуеті – жаңа даму кезеңіне инвестициялар салу», 

• «Агроөнеркәсіп: жаңа жібек жолында азық-түлік қауіпсіздігін қамтамасыз ету», 

• «Астана халықаралық қаржы орталығы — Еуразиялық қаржы нарықтарына шығу», 

• «Еуразиялық цифрлық күн тәртібі — Индустрия 4.0 инфрақұрылымын дамыту», 

• «Металлургия және тау-кен өнеркәсібінің мүмкіндіктері».

Ақпарат көзі: primeminister.kz

Екінші «Kazakhstan Global Investment Roundtable» халықаралық дөңгелек үстел аясында  «Металлургия және тау-кен өнеркәсібіндегі мүмкіндіктерді пайдалану» тақырында Үкіметтік брифинг өтті. Брифингтік сессияға ҚР Инвестициялар және даму министрі Жеңіс Қасымбек, шетелдік ірі тау-кен металлургиялық компаниялардың басшылары қатысты. Сессияға Ғаламдық тұрақты капиталды басқару ұйымының Инвестициялық комитеті төрағасының орынбасары Пирс Камберледж модераторлық етті.

Министрдің айтуынша, бүгінгі күні Тау-кен металлургия кешені Қазақстанның ЖІӨ 6,7%-ын, өнеркәсіптік өндірістің 24,7%-ын және экспорттың 24% -ын құрайды.

Жыл сайын металлургия өнеркәсібі өсімнің оң динамикасын көрсетіп келеді. 2018 жылдың 5 айында өсім 104% -ды құрады.

«Біздің мақсатымыз – жер қойнауын кешенді пайдалану және өнімдерді қайта өңдеуді арттыру. Сондықтан біздің министрліктің миссиясы бәсекеге қабілетті және инновациялық индустрияны құру арқылы ресурстарға тәуелді экономиканы әртараптандыру. Мысалы, Қазақстан 1,8 млрд. АҚШ доллары көлеміндегі болат өнімдерін шығарады, одан әрі өңдеу үшін шикізатты 1,4 млрд. АҚШ доллары сомасына экспорттайды. Сонымен бірге 2,5 млрд. долларға жоғары қосылған құны бар дайын өнімді импорттады. Бұл қара металлургия секторындағы дайын өнімнің экспортқа және ішкі нарықты қаматамасыз етуде үлкен сұранысқа ие екенін көрсетеді»,- деп атап өтті Жеңіс Қасымбек.

Министрдің пікірінше, Қазақстанда минералды шикізатты өндіруді және жаңа технологияларды енгізу мен жаңа өнімдерді өндіру арқылы қайта өңдеуді айтарлықтай арттырудың барлық алғышарттары бар.

2018 жылғы 3 шілдеде ҚР Премьер-Министрі Бақытжан Сағынтаевтың төрағалығымен екінші Kazakhstan Global Investment Roundtable (KGIR-2018) өтеді.

KGIR-2018-ге 650-ден астам ірі әлемдік компаниялардың және отандық бизнестің, мемлекеттік органдардың өкілдері, әлемдік саясаткерлер, сарапшылар, халықаралық ұйымдардың және дипломатиялық корпус өкілдері қатысады.

https://youtu.be/z9oZjpkk7vg

Шараның негізгі мақсаты — Қазақстанның инвестициялық мүмкіндіктерін ұсыну, Қазақстанның инвестициялар, экономикалық даму және бәсекеге қабілеттілікті арттыру саласындағы саясатын талқылау.

Инвестицияларды тарту үшін экономиканың мынандай маңызды салалары талқыланады:

• Жекешелендіру.
• Агроөнеркәсіптік секторды дамыту.
• Цифрландыру.
• Энергетика.
• Инфрақұрылым және логистика.
• АХҚО

Шара бағдарламасы «Қазақстан жаңа сын-тегеуріндерді қарсы алады» пленарлық отырысында мына тақырыптар бойынша дөңгелек үстелдер өткізуден өтеді:

• «Әртараптандырылып жатқан экономика үшін жаңа нарықтар құру»,
• «Еуразия аймағының логистикалық әлеуеті»,
• «Қазақстанның энергетикалық әлеуеті — дамудың жаңа кезеңіне инвестициялар»,
• «Еуразиялық цифрландыру күн тәртібі — Индустрия 4.0 инфрақұрылымын дамыту».

Бұдан өзге, KGIR-2018 алаңында үкіметтік брифингтер ұйымдастырылады:

• «Қазақстанда жекешелендіру бағдарламасының тиімділігін арттыру»,
• «Агроөнеркәсіп: Жаңа жібек жолының азық-түлік қауіпсіздігін қамтамасыз ету» 
• «Металлургия және тау-кен өнеркәсібінің мүмкіндіктері», 
• АХҚО-ның «Астана халықаралық қаржы орталығы — Еуразиялық қаржы нарықтарына кіру» презентация. 

Батыс Қазақстан облысында инвесторлардың қатысуымен жалпы сомасы 2,6 млрд.  АҚШ долларын құрайтын  11 жоба іске асырылуда. Бұл ақпарат Инвестициялар тарту және инвестициялық климатты жақсарту жөніндегі өңірлік кеңестің отырысы барысында айтылды.

Отырыс барысында «Kazakh Invest» ҰК» АҚ Басқармасының төрағасы Біржан Қанешев ұлттық компанияның қызметі туралы әңгімеледі және Батыс Қазақстан облысының шетелден инвестициялар тарту әлеуетінің зор екендігін атап өтті. Сонымен қатар ол өңірдің инвестициялар үшін тартымдылығы оның стратегиялық және географиялық орналасуымен, үлкен табиғи-ресурстық әлеуетімен байланыстылығын атап өтті.

Өз кезегінде БҚО әкімі Алтай Күлгінов өңірдің инвестициялық тартымдылығы оның экономикалық дамуының негізгі факторы екендігін баса айтты.

Өңір басшысы атап өткендей, атқарушы органдар Батыс Қазақстан облысының инвестициялық климатын жақсартуға және өңіраралық байланыстарды нығайтуға мүдделі. Бұл ретте ол инвесторларды тарту процесінде жобалардың барлығы бірінші кезекте өңірдің қажеттіліктеріне сәйкес болуы керектігіне назар аударды.

Батыс Қазақстан облысының инвестициялар тарту бойынша  2018-2022 жылдарға арналған өңірлік стратегиясы әзірленіп, бекітілген, оның шеңберінде инвестицияларды бүкіл цикл бойына қолдау жұмысы жоспарланған.

«Kazakh Invest» ұлттық компаниясы инвестициялық жобаларды «бір терезе» қағидаты бойынша қолдау қызметтерінің толық спектрін қамтамасыз етеді.

Отырыс барысында өңірлік өкілдік директоры Әнуар Ниетқалиев өкілдіктің қызметі туралы және облыстың әлеуеті жайлы баяндады. Атап айтқанда, өңірде жалпы сомасы 2,6 млрд.  АҚШ долларын құрайтын  11 жоба іске асырылуда. Бұған қоса, Әнуар Ниетқалиев кеңеске қатысушыларды жалпы сомасы 739 млн. АҚШ долларын құрайтын 9 тауашалық жоба туралы хабардар етті.

Отырыс жұмысына, сонымен қатар, Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің Батыс Қазақстан облысы бойынша  департаментінің басшысы Болат Исаков қатысты, ол «Инвесторларды сыбайлас жемқорлыққа қарсы қолдау» («Protecting Business and Investments») жобасының бастау алғандығы жөнінде айтып берді.

Бұл жобаны іске асыру қолайлы инвестициялық климат қалыптастыруға, бизнес пен инвесторлардың мемлекеттік өкімет институттарына сенімін арттыруға, шетелде елдің оң имиджін қалыптауға ықпал ететін болады. Департамент басшысы атап өткендей, жобаны Агенттік «Kazakh Invest» ұлттық компаниясымен бірлестікте жүзеге асыруда.

Сонымен қатар, өзінің Батыс Қазақстан облысына жұмыс сапары барысында «Kazakh Invest» Басқармасының төрағасы Біржан Қанешев «Смарт Орал» орталығының қызметімен танысты және жұмыс тобымен follow-up жобаларын, тауашалық жобаларды талдады.

Бүгін ҚР Инвестициялар және даму министрі Жеңіс Қасымбек Парламент Сенатының депутаттарына Қазақстан Республикасының кейбір заңнамалық актілеріне венчурлық (тәуекелді) қаржыландыру мәселелері бойынша өзгерістер мен толықтырулар енгізу туралы Заң жобасын таныстырды. Заң жобасы Мемлекет басшысының «Төртінші өнеркәсіптік революция жағдайындағы дамудың жаңа мүмкіндіктері» атты Қазақстан халқына Жолдауын іске асыру аясында әзірленді. Сенаторлардың алдында баяндама жасаған министр венчурлық қаржыландырудың шетелдік табысты тәжірибесін мысалға келтірді.

«Жеке венчурлық инвестицияларды тарту арқылы инновациялық және технологиялық бизнеске қолдау көрсету әлемде кең таралған.

Оның көлемі ондаған миллиард долларға жетеді. Мысалы: АҚШ - $52,1 млрд., Қытай Халық Республикасы – $15,5 млрд., Еуропалық Одақ –  $10,6 млрд., Үндістан - $5,2 млрд., Израиль - $1,9 млрд., Канада - $1,4 млрд.  Швейцария, Израиль және Сингапур сияқты инновациялық көшбасшы елдерде ұлттық венчурлық қорлар технологияларды әзірлеу мен енгізуде өте маңызды рөл атқарады. Бірақ инвестициялардың басым бөлігін жеке корпоративтік сектор іске асырады»,-деп атап өтті Жеңіс Қасымбек.

Министрдің айтуынша, Заң жобасының мақсаты венчурлық қаржыландырудың құқықтық базасын құру және инновациялық қызметті мемлекеттік қолдау жүйесін дамыту.

«Венчурлық қорлар жасалуы мүмкін келісімдердің жаңа формалары енгізілуде. Сонымен қатар, қорлар мен портфельдік компаниялар опциондық келісімге және қорлар мен портфельдік компаниялар опциондық келісімге қол жеткізе алады. Сондай-ақ келісімшарттарда келісімшарттар мен кепілдіктер туралы ережелерді қамтуға болады, олардың бұзылуы инвесторға келісімшартты бұзуды және шығындарды өтеуді талап ету құқығын береді. Бұл венчурлық қаржыландыру үшін пайдаланылатын барлық арнайы келісімшарттық құралдар мен жобалар қазіргі уақытта азаматтық заңнамамен реттелмеген»,-деді Жеңіс Қасымбек.

Сондай-ақ, түзетулер индустриялық-инновациялық қызметті қолдау шараларын толықтырып, венчурлық қорларға мемлекеттік қаржыландырудың жаңа тетігі болып табылады.

Индустриялық-инновациялық инфрақұрылымның элементі ретінде венчурлық қордың анықтамасы, даму институттары және басқа да ұлттық компаниялар арқылы венчурлық қорлар тарапынан тең қаржыландыру мүмкіндігі, тиімділікті бағалауға негізделген тәсілдерді енгізу мәселелері де қарастырылған.

Заң жобасын қабылдау арқылы жеке венчурлық капитал нарығын ынталандыру, цифрлы және басқа да инновациялық шешімдерді әзірлеушілердің өз экожүйелерін дамыту, нақты сектордың инновациялық белсенділігін арттыру, шетелдік инвестицияларды тарту, жаңа жұмыс орындарын ашу интеллектуалды ресурстар ағынын көбейту сияқты жұмыстарды атқарамыз. Ұсынылған заң жобасы отандық және шетелдік инвестицияларды инновациялық қызметке тартудың тағы бір маңызды қадамы»,-деп атап өтті министр.

Бүгін Қазақстан Республикасының Инвестициялар және даму министрі Жеңіс Қасымбек Жапонияның Экономика, сауда және өнеркәсіп вице-министрі Тадао Янасэмен екіжақты кездесу өткізді.

Кездесуде тараптар сауда-экономикалық, көлік-логистикалық салалар бойынша және жер қойнауын пайдалану мен бірлескен инвестициялық жобаларды іске асыруға қатысты ынтымақтастық мәселелерін талқылады. Жеңіс Қасымбек Жапонияны Шығыс Азиядағы Қазақстанның маңызды стратегиялық серіктестерінің бірі екенін атап өтті.

«Екі ел арасындағы қарым-қатынас стратегиялық, достық және сенімділік сипатына негізделген. Біз Жапониямен мұнайхимия, инфрақұрылым, фармацевтика, энергетика, ақпараттық технология мен инновация сияқты бағыттар бойынша өзара мүдденің бар екенін көріп отырмыз»,-деді кездесуде министр.

Өз кезегінде Тадао Янасэ жапониялық компаниялар Қазақстанға инвестиция салуға мүдделі екенін атап өтті. Айта кету керек, Жапония Қазақстандағы ірі инвесторлардың қатарына кіреді. Елімізде жапондық капиталдың қатысуымен 50-ден астам бірлескен кәсіпорын жұмыс істейді. Бүгінгі таңда жалпы сомасы 1,1 млрд. АҚШ доллары болатын 10 бірлескен ірі жоба іске асырылды. Сондай-ақ, құны шамамен 2 млрд. АҚШ доллары болатын 7 бірлескен ірі жобаны іске асыру жұмыстары жүріп жатыр.

Бұдан бөлек, бүгін Бірлескен комиссияның 7-ші отырысы өтуде. Оның аясында панельдік сессиялар, 30-дан астам B2B кездесулері өтіп, бірқатар коммерциялық құжаттарға қол қойылады. Екі ел арасында тауар айналым 2018 жылдың бірінші тоқсанында 460,9 млн. АҚШ долларын құрады. Бұл өткен жылдың сәйкес кезеңіндегі көрсеткіштен екі есе артық ( 2017 ж. І-тоқсанында 236,2 млн. АҚШ долл.). Қазақстаннан Жапонияға шығарылған экспорт 368,6 млн. АҚШ долларына жетіп отыр. Бұл 2017 жылдың бірінші тоқсанымен салыстырғанда бір жарым есеге көп (177,9 млн. АҚШ долл.).     

Бүгін Астанада Жапониядағы ҚР Елшілігінің және Kazakh Invest қолдауымен Қазақстан–Жапония форумы мен Экономикалық ынтымақтастық жөніндегі үкіметтік және жеке сектордың бірлескен комиссиясының VII отырысы өтіп жатыр. Форум аясында Жапонияның ірі компанияларымен ынтымақтастық туралы келісімдерге қол қойылды.

Форумның ашылуында ҚР инвестициялар және даму вице-министрі Арыстан Қабыкенов Жапония Қазақстанның Шығыс Азиядағы негізгі стратегиялық серіктестердің бірі екенін атап өтті. Екі ел арасында 2015 жылдан бері Инвестицияларды көтермелеу және өзара қорғау туралы келісім әрекет етеді.

«Қазақстан тәуелсіздік алған алғашқы жылдардан бастап шетелдік инвесторларға қолайлы жағдай жасау арқылы экономикалық өсуді қамтамасыз етуге басымдық берді. Жапония Қазақстанның ең ірі инвесторларының қатарында. 2005–2017 жылдар аралығында Жапониядан Қазақстанға тікелей инвестициялардың жалпы ағыны $5 млрд астамды құрады», — деп А. Қабыкенов, жапондық компанияларды ҚР жекешелендіру бағдарламасына қатысуға шақырды.

Өз кезегінде, Жапонияның Экономика, сауда және өнеркәсіп министрлігінің халықаралық істер жөніндегі вице-министрі Тадао Янасэ жапондық компаниялардың Қазақстанға инвестициялар салуға қызығушылық білдіріп отырғанын атап өтті.

Жапония–Қазақстан экономикалық комиссиясы төрағасының орынбасары, «ИТОТЮ» корпорациясының кеңесшісі Тосиюки Косуги мырза олардың компаниясы Қазақстанға өнеркәсіптік жабдықтарды, мұнай өнеркәсіптік химиясын және талшықтарды импорттайтынын, дегенмен Қазақстандағы қазіргі инвестициялық ортада елеулі өзгерістер болып жатқанын атап өтті.

«Қазір бізден жаңа бастамаларды жүзеге асыру талап етіледі, бұл біздің даму стратегиямызбен ұқсас келеді. Өткен жылы ҚР Үкіметі «Цифрлық Қазақстан» бағдарламасын қабылдады, және мен әрі қарай көптеген бағыттарда нақты екіжақты қарым-қатынасты қалыптастырғанымызды қалаймын», — деді ол.

Форумда ынтымақтастық туралы бірқатар меморандумға қол қойылды. Kazakh Invest басқарма төрағасы Сапарбек Тұяқбаев пен «Марубэни Корпорейшн» компаниясының вице-төрағасы Ямадзоэ Сигеру Алматы қаласында қалалық транспортты дамыту бойынша жалпы ынтымақтастық және өзара түсіністік туралы меморандумға қол қойды.

«Қазіргі таңда Алматыда біз МЖӘ схемасының аясында жеңіл рельстік көлік желісін салу бойынша жобаны жүзеге асыруға қатысты жұмыстарды жүргізіп жатырмыз. Құрылысқа, пайдалануға, техникалық қызмет көрсетуге және қаржыландыруға байланысты мәселелерді шешуден басқа, біз ЛРТ қалалық жоспарлаудың құрама бөлігі ретінде қарастырып, цифрлық инфрақұрылымды құруға қатысты жұмыстарды жүргізіп жатырмыз, және осылайша, қала тұрғындарын қолайлы жағдайлармен қамтамасыз етуге тырысып жатырмыз», — деді Ямадзоэ Сигеру.

«ҚазОрталық ЖКХ» АҚ, Mitsui & Co және Japan system Planing арасында жылу мен сумен жабдықтау жүйелерінде пилоттық жобаны жүзеге асыру бойынша өзара түсіністік пен ынтымақтастық туралы меморандумға, Kazakhstan Nuclear Power Plants пен The Japan Atomic Power Company, Marubeni Utility Services арасында ядролық энергетика саласындағы ынтымақтастық туралы меморандумға қол қойылған.

• «Ақпараттық технологиялар саласындағы және цифрлық саладағы ынтымақтастық — «Цифрлық Қазақстан» мемлекеттік бағдарламасы»;
• «Пайдалы қазбалардың кен орындарын өндіру және игеру саласындағы ынтымақтастық»;
• «Энергетика және экологияны сақтау саласындағы ынтымақтастық»,
•  «Қазақстан мен Жапония арасындағы бизнестегі жаңа бағыттар» тақырыптық панельдік сессиялары өтті.

primeminister.kz материалдарын жеке мақсаттан басқа, кез келген жағдайда пайдалану кезінде primeminister.kz веб-сайтына гиперсілтеме жасау міндетті.primeminister.kz материалдарын пайдалану кезінде:– басылым беттерінде немесе қағаз, таспа және т.б. секілді материал тасығыштардың өзге де түрлерінде пайдаланушы әр кез материалдардың www.primeminister.kz веб-сайтынан алынғанын көрсетіп отыруы міндетті– Интернетте немесе электронды түрде пайдаланудың өзге де түрлерінде пайдаланушы әр кез «www.primeminister.kz» веб-сайтының басты бетіне гиперсілтеме беруге міндетті.

Ақпарат көзі: primeminister.kz

Бүгін Астанада көлік және инфрақұрылым саласы бойынша Қазақстан-Австрия жұмыс тобының үшінші отырысы өтті. Отырыс Қазақстан Республикасы Инвестициялар және даму бірінші вице-министрі Роман Скляр мен Австрия Республикасының Көлік, инновация және технология министрлігінің Бас хатшысы Андрес Райхардтың тең төрағалығымен өтті.

Кездесу барысында тараптар екі елдің көлік тасымалдарын дамыту, көлік дәліздері, транзит, цифрландыру саласындағы соңғы жаңалықтар туралы ақпараттармен  алмасты.

Австрия тарапы автомобиль жолы мен теміржол көлігі, азаматтық авиация саласындағы ынтымақтастыққа мүдделі екендерін білдірді. Сондай-ақ автомобиль жолы, азаматтық авиация және теміржол салаларындағы жобаларды бірлесіп жүзеге асыруға мүдделілік бтанытты. Өз кезегінде қазақстандық тарап көлік инфрақұрылымына цифрлық технологияларды енгізудің маңыздылығын атап өтті және көлік-логистикалық жүйені цифрландыруда Австрия тәжірибесін зерттеуге қызығушылық танытты. Тұтастай алғанда, Қазақстан мен Австрия арасындағы көлік саласының екіжақты қарым-қатынасы оң динамиканы көрсетеді.

2018 жылдың сәуірінде Қазақстан Республикасының аумағы арқылы транзитпен Чэнду (ҚХР) - Алтынкөл (Қазақстан) - Вена (Австрия) бағыты бойынша 40 футтан тұратын 41 контейнері бар алғашқы контейнерлік пойыз ұйымдастырылған болатын. Сондай-ақ жақын арада контейнерлік пойызды кері бағытқа жіберу жоспарланып отыр.

Бүгін ҚР Инвестициялар және даму министрлігінде Қоғамдық кеңестің төрағасы Юрий Лавриненконың төрағалығымен Кеңестің кезекті отырысы өтті. Отырысқа ҚР ИДМ Жауапты хатшысы Замир Сағынов, ҚР Парламенті Мәжілісінің депутаты Альберт Рау және басқа да кеңес мүшелері қатысты.

Бірінші халықаралық және өңіраралық жолаушыларды автобуспен тасымалдаудағы проблемаларды шешу жөнінде қабылданған шаралар туралы Көлік комитетінің есебі тыңдалды. Бұл мәселе бойынша Көлік комитеті төрағасының орынбасары Самат Гилимов баяндама жасады.

Қазіргі уақытта Республика бойынша тұрақты автобус маршруттарында 1003 тасымалдаушы жұмыс істейді. Олар 19350 автобусты жолға шығарады. Ал, тұрақты емес тасымалға  берілген 389 лицензия негізінде 830 жолаушылар автобусы  тартылған.

«Өз кезегінде, көлік заңнамасының талаптарын өрескел бұзған тасымалдау фактілері бар. Осыған байланысты уәкілетті органдар тұрақты негізде бақылау жүргізіледі. Сондай-ақ, бірлескен жедел іс-шаралар ұйымдастырылады. Көлікті бақылау органдары ішкі істер органдарымен бірге 2018 жылдың 22 қаңтарынан 18 ақпанына дейін «Автобус» жедел-профилактикалық шарасын өткізді. Соның нәтижесінде барлығы 16 615 автобус тексеріліп, 477 заң бұзушылық анықталды. 501 әкімшілік материал толтырылып, 6,3 млн теңге айыппұл салынды. Сонымен қатар, міндетті техникалық байқаудан өтті деген жалған диагностикалық карталар анықталды»,-деді Көлік комитеті төрағасының орынбасары Самат Гилимов.

Сондай-ақ, 152 жолаушыларды және багажды тасымалдау ережелерін бұзу  фактісі, сапар алдындағы  тексеру мен медициналық тексеруі жоқ 100 дерек, тұрақты емес тасымалдау келісімінің болмауы 53, заңсыз тасымалдау 26, жүргізушілердің еңбек және демалу режиміндерінің бұзылу фактілері анықталған.

Бұл мәселе бойынша баяндамашы Кеңес мүшелерінің сұрақтарына жауап беріп, кейбір мәселелер талқыланды.

Сонымен қатар, Кеңесте Жол құрылыстарына домна шлагын пайдаланудағы қабылданған шаралар туралы Индустриялық даму және өнеркәсіптік қауіпсіздік комитеті мен Автомобиль жолдары комитетінің есебі тыңдалды.  

Екінші мәселе бойынша баяндама жасаған ҚР ИДМ Автомобиль жолдары комитеті төрағасының орынбасары Амангелді Беков бүгінгі таңда іске асырылып жатқан «Астана-Қарағанды-Балқаш-Алматы» Орталық-Оңтүстік дәлізі жобаларының 1444-1457,4 шақырымындағы «Қарағанды-Теміртау» учаскесінде және Қарағанды қаласының солтүстік айналма жолдары учаскелерінде домна шлак қиыршығын және домна шлагының түйіршіктелген құмын, сондай-ақ, күлді-органикалық емес тұтқыр материалдарды пайдалану қарастырылғанын және бұған қатысты бірқатар проблемалар барын айтты.

2018 жылғы 22 маусымда Қазақстан Республикасы Инвестициялар және даму министрлігінде жер қойнауын пайдалану құқығын алуға қатысты аукцион түріндегі конкурс өткізілді. Барлығы 69 жер қойнауы учаскесі жарияланды (64 учаске барлауға, 5 өндіруге). Аукционға негізінен геологиялық баралау жұмыстарын қажет ететін  жер қойнауы учаскелері шығарылды.

Өтініштерді қабылдау 2018 жылғы 23 мамырда аяқталды.

Өтініштерді қарастыру нәтижесінде 34 жер қойнауы учаскесі бойынша 57 компания қатысуға жіберілді.

Қатысушылар ұсынған қол қойылған бонус мөлшерінің көптігі жеңімпазды анықтаудың жалғыз және негізгі критериі.

34 жер қойнауы учаскесінен 31 жер қойнауы учаскесі бойынша жеңімпаз анықталды.  Жалпы қол қойылған бонус 16 942 650 000 теңгені құрады.

Жер қойнауы учаскесіне аукцион бойынша жер қойнауын пайдалану құқығын беру жүзеге асырылады. Қазақстан Республикасының «Жер қойнауы және жер қойнауын пайдалану туралы» Заңына сәйкес жер қойнауын пайдалану құқығы – бұл ең алдымен келісімшарт аумағына сәйкес жер қойнауын пайдаланушының жер қойнауын иелену және пайдалану құқығын жүзеге асыруы болып табылады. Ол негізінен жер қойнауын мемлекеттік геологиялық зерттеуге, пайдалы қазбаларды барлауға және (немесе) өндіруге қатысты, жерасты құрылыстарын салу және (немесе) пайдалану жөніндегі жұмыстарға арналады.

Аукцион жеңімпазымен Келісімшарт бекітіледі. Жер қойнауын пайдалануға арналған келісімшарт бұл мемлекеттің тиісті субъектіге жер қойнауын пайдалану құқығын берудің заңды формасының белгісі. Барлау кезеңінде келісімшарттың жарамдылық мерзімі 6 жылды құрайды. Жер қойнауын пайдалану құқығы келісімшарттың жарамдылық мерзімімен шектелген. Жер қойнауын пайдаланушы учаскені келісімшартта көзделген мақсатта ғана пайдалануы тиіс.          

Аукционның әлеуметтік-экономикалық пайдасы мынадай болмақ: Геология саласына инвестиция тарту, Қазақстан Республикасы аумағында геологиялық зерттеуді жоғарылату, Республикалық және жергілікті бюджетке салықтық төлемдер, жаңа жұмыс орындарын ашу, жергілікті қамтуды дамыту, жергілікті халық ішінен мамандарды оқыту және қайта даярлау, қайта өңдеу кәсіпорындарын бәсекелестікке даярлау.