Ауыл шаруашылық санағы

Қазақстанда ұлттық ауыл шаруашылығы санағы 1 тамызда басталды. Бұл туралы Орталық коммуникациялар қызметінде өткен брифингте ҚР Ұлттық статистика бюросы АСПиР төраға орынбасары Әсел Шауенова хабарлады.

Санақ БҰҰ Азық-түлік және ауыл шаруашылығы ұйымының (ФАО) 10-шы Дүниежүзілік ауыл шаруашылығы санағы бағдарламасы аясында өтуде. Санақ науқаны кезінде 300 мыңнан астам ауыл шаруашылығы құрылымын және шамамен 2 млн үй шаруашылығын қамту жоспарланып отыр. Бұл маңызды мемлекеттік іс-шара елдің аграрлық секторының жай-күйі туралы нақты әрі өзекті мәлімет жинауға мүмкіндік береді.

«Бұл – ауыл шаруашылығының қазіргі жағдайын талдауға және мемлекеттік қолдау шараларын жоспарлауға арналған негізгі құрал. Барлық фермерлер мен қосалқы шаруашылық иелерін sanaq.gov.kz сайтында онлайн санақтан өтуге шақырамыз. Сіздің жауабыңыз агросекторды дамыту үшін қандай шешімдер қабылданатынына әсер етеді», – деді Әсел Шауенова брифингте.

Санақтың онлайн кезеңі 31 тамызға дейін жалғасады. Оқуға қатысу үшін сайтқа ЭЦҚ, СМС-код немесе eGovMobile қосымшасындағы QR-код арқылы кіру қажет. Қатысушыларға екі түрдегі сауалнама ұсынылады – ауыл шаруашылығы кәсіпорындарына және бақшасы, көкөніс бағы немесе малы бар үй шаруашылықтарына арналған.

Анкеталар жер пайдалану, техника, өнім өткізу, жұмыспен қамту және т.б. тақырыптарды қамтиды. Қатысушылардың ыңғайлылығы үшін сайтта бейненұсқаулық, енгізілген кеңестер және сұрақтарға онлайн жауап беретін SANAQ мырза чат-боты бар.

Интернеті тұрақсыз елді мекендерде 2 684 өзіне-өзі қызмет көрсету аймағы ашылған. Олар әкімдіктер мен аудандық статистика бөлімдері ғимараттарында орналасқан. Бұдан бөлек, 1446 нөмірі бойынша тәулік бойы жұмыс істейтін байланыс орталығы бар.

Санақ барысында жиналған барлық деректер қатаң құпия сақталады. Олар тек статистикалық мақсатта, дербестендірілмеген түрде қолданылады және салық, құқық қорғау немесе өзге мемлекеттік органдарға берілмейді. Санаққа қатысатын барлық қызметкерлер мен сұхбат алушылар ақпаратты жария етпеу туралы міндеттемеге қол қояды. Сондай-ақ Бюро санақ қызметкерлері қатысушыларға телефон шалмайтынын және СМС арқылы келген кодтарды ешқашан сұрамайтынын ескертеді.

Екінші кезең офлайн форматта өтіп, 20 қыркүйекте басталып, 20 қазанда аяқталады.