Өзбекстандағы байқауларда Абай қаласының жас бишілері сегіз жүлдеге ие болды

Абай қаласының жас бишілері Ташкентте өткен екі халықаралық байқауда көрермендер мен қазылар алқасының жүрегін баурап алды. «Дидар» би ансамблі төрт Гран-при мен бірінші орындарға ие болды.

«Жеті өнер» байқауында ұжым балалар мен ересектер арасында екі жас санатында өнер көрсетті. Кіші құрам қазылар алқасына «Қамажай» және «Тұғырлы Тұран» билерін, ал үлкендері – «Асыл арман» және «Ғасырлар үні» билерін ұсынды. Бұл байқауға Өзбекстан, Қазақстан, Қырғызстан және Әзірбайжаннан 500-ге жуық әртіс қатысты.

– Қарағанды облысы осындай жарыстарда әрдайым жоғары деңгей көрсетіп келеді, – деді байқау жетекшісі Сандуғаш Құрманова. – Қазылар алқасы бишілердің өнерін жоғары бағалап, төрт нөмірді де Гран-приге лайықты деп таныды. Сонымен қатар, ансамбльдің көркемдік жетекшісі Дидар Аханова «Талантты балалардың үздік педагогы» және «Үздік ұжым» номинациялары бойынша марапатталды.

Бірінші жеңістен кейін екінші, одан да ауқымды - International Championship Dance in Square World Uzbekistan байқауында жетістікке жетті. Оған Германия, Швейцария, Чехия және Орталық Азия елдерінен 1000-ға жуық әртіс қатысты.

«Дидар» ұжымы алдыңғы байқауда марапатқа ие болеан төрт нөмірді орындап, тағы төрт бірінші орынды иеленді.

– Біз «Қамажай» биіне бір жарым жыл дайындалдық, ал «Тұғырлы Тұран» биін жарты жылдан астам уақыт бойы жаттадық. Жарыс алдында күніне 4–5 сағаттан жаттықтық. Бізге артылған үмітті ақтағанымызға қуаныштымыз, –  дейді ансамбль бишісі 8 жасар Кәусар Бағдәулет.

Көркемдік жетекшісі Дидар Аханова атап өткендей, бұл жеңіс ата-аналар мен жанкүйерлердің табанды дайындығы мен қолдауының нәтижесі болды.

– Біздің ұжымда Абай қаласының мектептерінен іріктелген 60-қа жуық биші бар. Бұл жеңіс – әрқайсымыздың еңбегіміз. Алда бізді жаңа шыңдар күтіп тұр! – деді Дидар Аханова.