Қарағандыда балаларға арналған жаңа оңалту орталығы ашылады
Қарағанды облысының әкімі Ермағанбет Бөлекпаев облыс орталығын аралау барысында әлеуметтік және коммуналдық сала нысандарымен және кезекте тұрғандарға арналған тұрғын үйлер құрылысымен танысты. Сондай-ақ, жеке қабылдауында болған тұрғынның өтініші бойынша Сәкен Сейфуллин көшесіне барды.
Қарағандылықтар әкімге қалада тұратынын, бірақ көшенің күйзеліске ұшырағанын айтты: жарықтандыру жоқ, үйлерге газ берілмеген, жолдар көп жылдан бері жөнделмеген. Аймақ басшысы биыл газ өткізу басталатынын, одан кейін жолдарды жөндеуге және жарықтандыруға кірісетінін айтты. Қарағандылықтар проблемалық мәселелерді жедел шешкені үшін әкімге алғыс айтты.
Ермағанбет Бөлекпаев салынып жатқан аутистік спектрі бұзылған балаларға арналған орталықта болды. Бұл жаңа форматтағы білім беру-түзету мекемесі. Жоба облыс әкімдігімен, «Самұрық-Қазына», «Қазақстан халқына» және «Қамқорлық қоры» қорларымен бірлесіп іске асырылды.
Орталық 125 балаға арналған. Мұнда 100-ден астам жұмыс орны құрылады. Орталыққа мамандарды денвер жүйесі бойынша өздері оқытатын болады.
– Балалармен нейро-түзету жұмысы үшін бізде интерактивті және сенсорлық бөлмелер болады. Логопедтермен, дефектологтармен және басқа мамандармен сабақтар өтеді деп көзделген. Сондай-ақ, орталықта балалар ағаш ұстасы, тігін және қыш жасау шеберханаларында қарапайым еңбек дағдыларын игере алады, – дейді «Қамқорлық қоры» директорының орынбасары Гүлмира Әбілдинова. – Бұл аутизм және басқа да психикалық ауытқулары бар балаларға көмек көрсетудің үздік әдістері мен әлемдік тәжірибелерін қолдана отырып құрылған еліміздегі сегізінші орталық.
Аймақ басшысы ғимараттың жөнделуімен танысты. Өткен жылы мұнда коммуникациялар мен сымдар ауыстырылды. Ал биыл жоспар бойынша қасбетті жөндеу, аумақты абаттандыру, терезелерді ауыстыру көзделген. Орталық осы жылдың тамыз айында ашылуы тиіс.
Ал № 3 автопаркте облыс әкімі ұжыммен кездесті. Бүгінгі таңда кәсіпорында 1035 адам жұмыс істейді. Автопаркте 448 автобус бар, көлік қоры 80%-ға жаңартылды. Биыл 55 автобус сатып алу жоспарланған, оның 10-ы Шахтинск қаласының ішкі бағыттарына жіберіледі.
Аймақ басшысы автопарктің материалдық-техникалық базасымен, сондай-ақ жүргізушілер мен қызмет көрсететін персоналдың еңбек және демалыс жағдайларымен танысты.
Жақында мұнда жуғышты, қазандықты жаңғырту бойынша жұмыстар жүргізілді,
қызметкерлерге арналған спорттық-сауықтыру кешені жабдықталды.
Жүргізушілер Ермағанбет Бөлекпаевқа жолдар мен кептелістердің жай-күйіне шағымданып, Майқұдық бағытындағы айналма жолға назар аударуды сұрады.
Облыс әкімі ауа райы қолайлы болысымен жолдарды жөндеуді бастауды тапсырды.
Биыл Қарағандыда абаттандыру бойынша ауқымды жұмыстар жоспарланған. Жаяу жүргіншілердің жайлылығы басымдыққа ие. Сондай-ақ, басталған жобаларды аяқтау жоспарланған. «Халық қатысатын бюджет» бойынша жаңа саябақтар, балалар алаңдары мен демалуға және спортпен айналысуға арналған орындар жасалады. Қазыбек би атындағы ауданда 65, Әлихан Бөкейхан ауданында 43 жоба жүзеге асырылады.
Облыс әкімі Шахтерлер даңғылы мен Язев көшесіндегі саябақтарды аралап көрді. Язев саябағында жаңа жарықтандыру тіректері, орындықтар, қоқыс жәшіктері орнатылып, футбол алаңы жабдықталады. Соңғы рет жөндеу жұмыстары 10 жыл бұрын жүргізілген.
Шахтерлер даңғылындағы жаңа саябақта тротуар плиткаларын төсеу, сондай-ақ № 3 емханаға кіреберіс жолдар мен тұрақтарды жайластыру жоспарланған. Бұл мәселемен тұрғындар өңір басшысына бірнеше рет жүгінген. Бұдан басқа, жаңа жарықтандыру тіректері, дүкендер мен қоқыс жәшіктері орнатылады.
Облыс әкімі әлеуметтік серіктестік аясында қоғамдық орындарды абаттандырып жатқан «Тұрғын үй қоры» компаниясына алғысын білдірді.
– Бізге қоғам алдындағы жауапкершілігін түсінетін әлеуметтік бағдарланған компаниялармен жұмыс істеу керек. Олар тек үй салып қана қоймай, сонымен қатар сапалы қала ортасын да жасауда, – деп атап өтті Ермағанбет Бөлекпаев.
Қаланы аралау кезінде Ермағанбет Бөлекпаев 30-шы шағын аудандағы құрылыс алаңында болды.
2023 жылы мұнда кезекте тұрғандар мен «Отбасы Банктің» салымшылары үшін 358 пәтерлік 9 қабатты үш үйдің құрылысы басталды. Нысанның дайындығы 60% құрайды. Қазіргі уақытта № 1 үйдің монолиттік жұмыстары және № 2 және 3 үйлердің ішкі әрлеу жұмыстары жүргізілуде.
Аймақ басшысы сондай-ақ «Оазис» шағын ауданына жылу беру жұмыстарының қалай жүріп жатқанын да көрді. Өткен жылы шағын ауданға 2 шақырым жылу желісі тартылды. Орталық жылу пунктінің құрылысын аяқтау қалды.
Мұндай айналымдар апта сайын өткізіледі. Аймақ басшысы атап өткендей, абаттандыру мен тазалық мәселелеріне баса назар аударылады. Қыстан кейін қала көшелері мен аулаларын ретке келтіру қажет.