Қарағанды қаласының 90 жылдығына арналған патриоттық байқаудың қорытындысы шықты

Жайық Бектұров атындағы облыстық жасөспірімдер кітапханасында "Қазыналы Қарағандым!" қалалық байқауының жеңімпаздары марапатталды. Сайысқа 27 білім беру ұйымының 15-тен 18 жасқа дейінгі 142 оқушысы қатысты.

– Халықаралық кітап және авторлық құқық күніне орай біздің кітапханада жасөспірімдерге арналған кітап апталығы ұйымдастырылды. Осы апта аясында Қарағандының 90 жылдығына арналған патриоттық байқау өтті, – дейді Жайық Бектұров атындағы облыстық жасөспірімдер кітапханасының директоры Нұргүл Қаленова. – Оның басты мақсаты – жастардың назарын қала тарихына аудару.

Байқау екі кезеңнен тұрды. Алдымен оқушылар тестілеуден өтті. Сұрақтар география, тарих, мәдениет, экономика, топонимика, Қарағандының көрікті жерлері, табиғи ресурстары, сондай-ақ қаламыздың танымал адамдары туралы болды. Ал екінші турда қатысушылар диктант жазды. Мәтін Ғабиден Мұстафиннің әйгілі "Қарағанды" романының негізінде жасалды.

Тесттер бойынша ең жоғары баллды № 1 гимназия, № 95 мектеп-гимназия және № 48 жалпы білім беретін мектеп оқушылары алды. Ал екінші кезеңнің қорытындысы бойынша № 95 мектеп-гимназиясының, Сләмия Саттаров атындағы мектеп-лицейінің және Шәкәрім атындағы гимназияның оқушылары алға шықты.

– Өте қиын болды деп айта алмаймын, мен дайындалдым. Бірақ аздаған қиындықтар тудырған тарихқа қатысты сұрақтар болды. Бірақ мен диктант жазудан қиналған жоқпын. Біздің міндетіміз – ана тілінде сауатты жаза білу. Мен мұғалімдерім және ата-анама өте ризамын, – дейді Сләмия Саттаров атындағы мектеп-лицейдің 9-сынып оқушысы Меруерт Түсіпханова.

Жеңімпаздарға дипломдар мен сыйлықтар табыс етілді.