Премьер-министр Саран үлгісімен республиканың басқа моноқалаларында индустриялық аймақтар құруды тапсырды

ҚР Премьер-министрі Олжас Бектенов Қарағанды облысында Saran индустриялық аймағын құруды үлгі ретінде келтірді, деп хабарлайды UKIMET. Үкімет басшысы еліміздің моноқалаларын дамыту үшін осы тәжірибені ұстануды тапсырды.

– Өнеркәсіп министрлігі Ақтөбе, Атырау және Қарағанды облыстарының әкімдіктерімен бірлесіп, ағымдағы жылдың соңына дейін Хромтау, Сәтбаев, Балқаш және Құлсары моноқалаларында Саран қаласының үлгісі бойынша индустриялық аймақтар құруы қажет. Болашақта бұл тәжірибені басқа моноқалаларға да тарату қажет, – деді Олжас Бектенов Үкімет отырысында.

Моноқалаларда шағын және орта бизнесті дамыту жұмыспен қамтудың қала құраушы кәсіпорындарға тәуелділігін төмендетуге мүмкіндік береді, деп атап өтті премьер-министр. Бұл экономиканы әртараптандыруды ынталандырады және жаңа жұмыс орындарын құруға ықпал етеді.

Естеріңізге сала кетейік, Saran индустриялық аймағы Қарағанды облысында 2021 жылы бұрынғы РТИ зауытының өнеркәсіптік алаңында құрылған болатын. Бұл моноқаланы дамыту және облыс экономикасын әртараптандыру үшін өсу нүктесіне айналды. Қазірдің өзінде оның аумағында бірқатар ірі жобалар: автобус, шина зауыттары және тұрмыстық техника өндірісі іске қосылды. Металлургия саласында жаңа жобалар жоспарлануда. Оның құрылуы тұрғын үйді қайта қалпына келтіруді ынталандырды, бұл ауданда бұрын қараусыз қалған көпқабатты үйлер қалпына келтірілуде.