Қарағанды облысының 19 ауылында "Ауыл – Ел бесігі" жобасы бойынша жолдар жақсарды

Қарағанды облысында "Ауыл – Ел бесігі" арнайы жобасы биыл 35 ауылдық елді мекенді қамтыды. Бұл 58 мыңнан астам тұрғынның өмір сүру сапасын жақсартуға көмектеседі. Мысалы, 19 ауылда жолдар жөнделді.

Арнайы жоба өңірдегі ауыл тұрғындарының өмірін қалай өзгертетіні жайлы аппараттық кеңесте айтылды.

– Бүгінгі таңда 39 жобаның 19-ы аяқталды.  Нәтижесінде 18 мыңнан астам ауыл тұрғындары үшін жол сапасы жақсарды. Жолдарды жөндеуге қатысты тағы үш жоба бойынша орындалған жұмыстар қабылдау сатысында. 17 жоба бойынша жұмыстар жалғасуда, – деді экономика басқармасының басшысы Татьяна Аблаева.

Ол жалпы 99,2 шақырым кентішілік жол жөнделгенін айтты. Атап айтқанда, Абай ауданында Жон, Южное, Құлайғыр, Юбилейное және Южный кенттерінің жолдары жасалды. Бұқар жырау ауданында жеті ауыл қамтылды – Үміткер, Ботақара, Керней, Тоғызқұдық, Шешенқара, Ростовка және Гагаринское. Нұра ауданында бес ауылда – Көбетей, К. Мыңбаев, Заречное, Тассуат және Алғабас. Осакаров ауданында екі – Есіл және Сарыөзек елді мекендерінде.

Нұра ауданы Байтуған, Егінді және Ахмет ауылдарында жолдарды жөндеу бойынша тағы үш жоба іске асырылды.

Сонымен қатар, арнайы жоба әлеуметтік инфрақұрылымды жақсартуға көмектеседі.

Бұқар жырау ауданының Гагаринское ауылында мектепке қосымша сыныптар, спортзал мен асхана орналастырылатын қосымша ғимарат салынуда. Дене шынықтыру-сауықтыру кешендері Абай ауданы Топар кентінде және Бұқар жырау ауданы Ғ. Мұстафин ауылында салынуда. Бұл жобалар келесі жылы аяқталады деп жоспарлануда.

Сондай-ақ, "Ауыл – Ел бесігі" бойынша Бұқар жырау ауданының үш ауылында – Доскей, Көкпекті, Үштөбеде жаңа клубтар салынады. Нұра ауданының Шұбаркөл кентінде оқушылар үшін спортзал жабдықталады. Ақтоғай ауданы Сарышаған кентінің тұрғындары жаңа ДСК-де спортпен шұғылдана алады. Осакаров ауданы Ақбұлақ ауылында мектепті қайта құру жұмыстары жүргізілуде.

Осакаров және Шет аудандарының бірқатар ауылдарында мәдениет үйлері қайта қалыпқа келтіріледі, жобалар аяқталу сатысында. Ал Бұқар жырау ауданы Трудовое және Доскөй, Нұра ауданы Ізенді ауылдарында сумен жабдықтау жақсаруда.

– Жолдарды жөндеу жұмыстары жүргізілді. Ауылдық клубтарға күрделі жөндеу жұмыстары аяқталуда. Қалған жобаларды уақтылы аяқтап, жұмыс барысы мен сапасын бақылау қажет, – деді облыс әкімі Ермағанбет Бөлекпаев.