Қарағандылық дирижер Республикалық Нұрғиса Тілендиев байқауының Гран-при иегері атанды

Алматыда өткен Нұрғиса Тілендиев атындағы республикалық байқауда еліміздің әр өңірінен келген 19 дирижер үздік атағы үшін күресті. Бас жүлдені жас қарағандылық дирижер Әбілқайыр Сағымбаев алды.

Қатысуға 18 бен 35 жас аралығындағы 25 үміткер өтініш берді. Байқау екі кезеңнен тұрды.

– "Отырар сазы" сияқты тамаша оркестрмен жұмыс істеу мен үшін үлкен мәртебе болды. Бірінші турда біз Қаршыға Ахмедияровтың "Күткенде" және Кенжебек Күмісбековтың "Дала сыры" күйлерін ойнадық. Екіншісінде тек Нұрғиса Тілендиевтің туындылары ғана болды – "Алтын дән" күй-поэмасы мен қобыз бен оркестрге арналған және "Абай табиғаты" туындысы. Тілендиевтің шығармалары күрделі және оларды орындау үшін мұқият дайындық пен уақыт қажет. Менің байқаудағы жұмысым Гран-приге ие болды. Республика бойынша басқа оркестрлермен түрлі концерттерге шақырулар келіп түсті, – деп бөлісті Е.Рахмадиев атындағы Қарағанды симфониялық оркестрінің, Тәттімбет атындағы Қазақ халық аспаптар академиялық оркестрінің және С. Сейфуллин атындағы Қаздрамтеатр оркестрінің дирижері Әбілқайыр Сағымбаев.