Қарағандыда нотариаттық кеңсе қызметкерлеріне арналған қазақ тілі бойынша оқыту курсы таныстырылды
Қарағандыда "Тілдерді оқыту курстары: заманауи технологиялар мен цифрлық оқу-әдістемелік кешендерді әзірлеу" атты екі күндік республикалық семинар өтіп жатыр.
Онда Қарағанды облысының тілдерді оқыту орталығының базасында әзірленген, әртүрлі кәсіби салаларда мемлекеттік тілді үйренуге көмектесетін әдістемелік материалдар мен оқу-әдістемелік кешендер ұсынылды. Сондай-ақ нотариатта жұмыс істейтіндерге арналған білім беру құралы таныстырылды.
Семинар тілдерді оқыту орталықтарымен тәжірибе алмасу үшін ұйымдастырылған.
– Жалпы өңірде тегін оқыту курстарын ұйымдастыруда тәжірибеміз жақсы. 2016–2019 жылдары 5 деңгейлі оқу-әдістемелік кешен дайындалды. Бұл кешенде аудио дискілер, QR кодтары, әдістемелері бар. Биыл нотариаттық кеңсе қызметкерлеріне арналған оқыту курсы дайындалды.
Семинарда нотариат саласында жұмыс істейтіндерге арналған А1 білім беру құралы таныстырылды. Бізде жуырда қазіргі заманғы талаптарға сәйкес "Сарыарқа-3" 5 деңгейлі оқу-әдістемелік кешенін әзірлеу жоспары бар, – деді Қарағанды облысының тілдерді дамыту басқармасының басшысы Салтанат Әбеуова.
Қарағанды облысының тілдерді оқыту орталығының директоры Алмагүл Игенова соңғы жылдары мемлекеттік тілді оқыту курстарына сұраныс едәуір артқанын атап өтті. Биыл 500-ден астам адамды қазақ тіліне үйрету жоспарлануда, қазір 200 адам оқытудан өтуде.
Айта кетейік, Қарағанды облысының әділет саласындағы тілдерді оқыту орталығының әдістемесі республикадағы үздіктердің бірі болып саналады.
Семинарға Жамбыл, Қостанай, Жетісу, Көкшетау және Ұлытау облыстарының тілдерді оқыту орталықтарының директорлары, әдіскерлері мен оқытушылары, сондай-ақ жергілікті тілтанушылар қатысты. Басқа өңірлердің қатысушылары біздің облыста әзірленген білім беру құралдарын жоғары бағалады.
– Мұндай семинарлар тілдерді оқыту орталықтары үшін өте қажет. Біз Қарағанды облысында тәжірибе алмасу үшін болдық, өзімізде курстар өткізу үшін жергілікті мамандарды шақырдық. Біз өз аудандарымызды бір жүйе бойынша оқытқымыз келеді, – деп атап өтті Жетісу аудандық тілдерді оқыту әдістемелік орталығының басшысы Жеңіс Жолдыбаев.