Алып жеода, мүк агатының үйіндісі: Қарағандыдағы көрмеде табиғи әсемдік көрсетілді
Қарағанды Экомұражайында «Аширит» ерекше тас жинаушылар клубының көрмесі ашылды.
Экспозиция дәстүрлі түрде сәуірдің бірінші жексенбісінде атап өтілетін Геолог күніне орайластырылған.
Келушілерге жеке коллекциялардан бірегей экспонаттарды көруге, жер қойнауының табиғи әсемдігін бағалауға мүмкіндік туды.
«Аширит» клубының төрайымы Алма Жұмағалиева әр тастың энергетикасына сенеді.
Көрмеде әлемнің түкпір-түкпірінен жүздеген сирек үлгілер жинақталған. Олардың көпшілігі Орталық Қазақстанның, атап айтқанда Қарағанды облысының кеніштері мен далаларында жиналды.
Экспозицияның ерекше жәдігері – мүк агатының үйіндісі. Оны бірнеше жыл бұрын Бетпақдала маңында тапқан. Геологтар ауыр салмақты олжа сұр және түсініксіз болып көрінгенін, бірақ оның ерекше сұлулығы бірден көрінетінін айтты. Артық минералды қабаттарды тазалап, жылтыратқаннан кейін тас ашық түстермен жарқырай түскен.
Экспонат көпшілік назарына алғаш рет қойылып отыр. Ашылу салтанатында табиғи мүсін тіпті дау тудырды. Тасты әркім әрқилы көрді: біреуі әйел сұлбасын елестетсе, тағы бірі еркек пен әйелдің бастауы сабақтасқан деген ойын білдірді.
Алып аметист жеоды да таң қалдырады. Бұл Бразилия топтамасының бір бөлігі.
Тау хрусталінің кристалды друзасы да таңқаларлық.
Сөрелердің бірінде крест бейнесі бар нефрит үлгісі ерекшеленеді. Бұл жарты ғасырға жуық тәжірибесі бар геолог, қарағандылық Сергей Клевцовтың коллекциясындағы таңғажайып жәдігер.
– Мүмкіндігінше әртүрлі минералдарды ұсынуға тырыстым. Негізгі массасы – кремнеземдер, кварцтар, халцедондар, силикаттардың барлық түрлері. Ұзақ жылдар жинақтағанымның арқасында менің коллекциям ұлғая берді – мыңдаған дана ерекше тастар, мен оларды ешқашан санамадым. Орталық Қазақстанның жер қойнауынан көптеген минералдар таптым. Сондай-ақ, Орал, Забайкалье, Таулы Алтай бойынша экспедициялардан алып келдім. Коллекцияның жартысына жуығы басқа тас жинаушылармен және әуесқойлармен айырбастаап алған қор болып табылады, – деді көрмеге қатысушы.
Көрменің ашылуына осы мамандықты енді ғана меңгеріп жатқан болашақ геологтар да келді.
– Мен біздің аймақтың пайдалы қазбаларға бай екенін білдім, бірақ оның осыншалықты ауқымды екенін елестете алмадым. Мұндағы тастар алуан қилы. Өте қызықты және танымды көрме, – деп бөлісті А. Сағынов атындағы тау-кен факультетінің 3 курс студенті Михаил Кряхов.
Көрмеде асыл тастардан басқа олардан жасалған зергерлік бұйымдар мен көркем туындылар ұсынылған.
Экомұражайдағы көрме 15 сәуірге дейін жалғасады. Мекен-жайы: Бұқар жырау даңғылы, 47 (Каскад алаңында «ЦентрКазНедра» ғимараты, 1-қабат).
Экспозицияны жексенбіден басқа кез келген күні сағат 09:00-ден 18:00-ге дейін көруге болады. Кіру тегін.
