Қарағанды облысының әкімі Ермағанбет Бөлекпаев өзінің алғашқы жұмыс күнін кеншілермен кездесуден бастады. Ол "АрселорМиттал Теміртау" АҚ еңбек ұжымдарына төлемдер мәселелері жөніндегі келісу комиссиясының отырысын өткізді. Талқылау барысында желтоқсанда 13-ші жалақыны төлеу және 2023 жылғы 1 қаңтардан бастап жалақыны көтеру туралы шешім қабылданды.
"АрселорМиттал Теміртау" АҚ Бас директоры Владимир Яблонский желтоқсан айында барлық үш департамент пен еншілес компаниялардың қызметкерлері жыл қорытындысы бойынша 100% мөлшерде сыйақы алатынын айтты. Ай сайын 25 мың теңге төлем сақталады, үстемеақы қауіпсіздік бонусына аударылады, ал индикаторлар кәсіподақтармен бірлесіп әзірленеді.
2023 жылғы 1 қаңтардан бастап барлық бөлімшелер қызметкерлерінің жалақысы инфляция мөлшеріне индекстелетін болады.
– Шешім өте қиын болды. Бізге облыс басшылығының қатысуымен бірнеше бірлескен отырыстар қажет болды. Келіссөздер сәтті аяқталды, – деп түсіндірді "Қорғау" көмір өндірушілер кәсіподағының төрағасы Евгений Буслаев. – Келісім комиссиясы өз жұмысын жалғастырады. Бізде жүйелік сипаттағы бірқатар мәселелер бар: көмір департаментінің кәсіпорындарын персоналмен қамтамасыз ету, жабдықтарды жаңарту, шахталарды дамыту перспективалары.
"Саран" шахтасының өндіру ауысымының бригадирі Асқар Жұмамұратов әділ шешімге қол жеткізілгенін атап өтті.
– Әңгіме қатаң болды және ер адамдар сияқты келістік, – деп санайды ол. – Төлемдер бойынша өз талаптарын толық көлемде орындауына қол жеткіздік. Компания басшылығы біздің талаптарымызды қабылдады.
Ермағанбет Бөлекпаев кеншілер ұжымдарының барлық мәселелерін шешу қажеттігін атап өтті.
– Мен осыған дейін де келісім комиссиясының отырыстарына қатысқан едім. Барлық сұрақтарды білемін. Мен әрқашан тыңдауға, жауап беруге дайынмын. Осындай форматта кездесеміз, – деді облыс әкімі.
Фото Еркебұлан Хадылбектікі