Қарағандылық оқушылар республикалық астрономиялық турнирдің күміс жүлдегерлері атанды

Қарағанды облысының командасы Мейірхан Әбділдин атындағы оқушылар арасында республикалық астротурнирде екінші орын алды. «Адам, Жер, Ғалам» зияткерлік жарысы Алматыдағы «Бөбек» Ұлттық ғылыми-практикалық, білім беру және сауықтыру орталығының обсерваториясының базасында өтті.

Астротурнир – бұл жоғары сынып оқушыларының күрделі зерттеу және ғылыми мәселелерді талқылау, сондай-ақ өз шешімдерін сенімді түрде ұсыну және оларды астробой деп аталатын ғылыми пікірталастарда қорғау қабілетіндегі жеке-командалық сайысы.

Жарысқа Қазақстанның барлық өңірлерінен 17 команда қатысты. Білім қазақ тілінде де, орыс тілінде де көрсетілді.

Қарағанды облысының намысын «Дарын» мамандандырылған мектеп-лицей-интернатының 9-шы және 10-сынып оқушылары Алина Даужанова, Ырысты Наурызбай, Ерсұлтан Төлеухан, Гүлназ Зайкен, Нұрасыл Төлеубаев қорғады. Команданы физика пәнінің мұғалімі Саян Бұлкенов басқарды.

– Астротурнир 2009 жылдан бері өткізіліп келеді. Біздің мектеп бұл жарысқа алғаш рет қатысты. Қазақ тіліндегі командалық есепте екінші орын – жақсы нәтиже. Қарсыластар мықты болды. Гран-приді Шымкенттен келген балалар жеңіп алса, Алматылық НЗМ командасы бірінші орынға ие болды, Маңғыстаудан келген оқушылар үздік үштікті түйіндеді, – деді Саян Бүлкенов.

Астротурнир аяқталғаннан кейін оқушыларға Алматы қаласы және Алматы облысы бойынша экскурсиялар ұйымдастырылды.