Қазақстандық актерлер Венециядағы кинофестивальде арнайы сыйлыққа ие болды
79-шы Венеция халықаралық кинофестивалінде Әділхан Ержановтың "Голиаф" қазақстандық фильмі Италияның тәуелсіз киносыншыларының арнайы сыйлығына ие болды.
Premio bisato d'oro 2022 Best Actors сыйлығы үздік актерлер – Берік Айтжанов пен Данияр Алшыновқа берілді.
Естеріңізге сала кетейік, Әділхан Ержановтың нуар жанрында түсірілген "Голиаф" көркем фильмі 31 тамыз бен 10 қыркүйек аралығында Лидо аралында өткен 79-шы Венеция Халықаралық кинофестивалінің Orizzonti Extra ("Жаңа Көкжиектер") конкурстық бағдарламасына енді.
Фильмге белгілі қазақстандық актерлер – Берік Айтжанов, Данияр Алшынов, Альмира Тұрсын және Еркен Губашев түскен. Фильмде ресейлік актерлер Дмитрий Чеботарев пен Александра Ревенко да бар.
Orizzonti Extra бағдарламасында режиссерлердің жаңа есімдерін ашқан әлемдік кинематографияның басты бағыттары көрсетілген.
Кинофестиваль кезінде әр түрлі жанр мен форматтағы жобаларды көрермендер қатарынан құрылған қазылар алқасы бағалады.
"Голиаф" фильмі 29 қыркүйектен бастап Ресей кинотеатрларында көрсетіледі.