Қарқаралы ауданында Өсібай ауылының мерейтойы аталып өтті

Қарқаралы ауданының Н. Нұрмақов атындағы ауылдық округінде Өсібай ауылының 60 жылдығы аталып өтті. Мерейтойды тұрғындар игі істермен және спорттық жарыстармен атап өтті.

Өсібайлықтарды Қарқаралы ауданының әкімі Ерлан Құсайын құттықтап, кезінде ауылдың дамуына үлес қосқан қарт адамдарға құрмет грамоталарын табыс етті.

Өткен жылы елді мекенге 60 жыл толды, бірақ карантинге байланысты олар үлкен мереке өткізе алмады.

– Бір жыл бұрын демеушілер, ауыл тумалары мен тұрғындары ақша жинады. Бұл қаражатқа тоған қалпына келтірілді, бастауыш мектептің терезелері ауыстырылды, қоқыс шығарылды, ФАП-қа қажетті жабдықтардың бір бөлігі сатып алынды, сонымен қатар ауылға кіре берісте "Өсібай" деген жазу орнатылды, мешітте жөндеу жұмыстары жүргізілді, – дейді Н. Нұрмақов атындағы ауылдық округінің әкімі Талғатбек Біләлов.  – Тұрғындарды мерейтоймен құттықтаймын. Біздің ауылдық округ өркендей берсін!

Мерекеге орай киіз үйлер тігіліп, концерттік бағдарлама ұйымдастырылды.

Түрлі алаңдарда ұлттық спорттық жарыстар мен ойындар өткізілді: қой көтеру, арқан тарту, қазақ күресі, тай жарыс, аламан бәйге және көкпар.

– Қазақ күресінен жарысқа Қарағанды облысының барлық аудандарынан және Қарағанды, Нұр-Сұлтан және Орал қалаларынан 40-қа жуық палуандар қатысты. Спортшылар екі салмақ дәрежесінде жарысты: 70 кг дейін және 70 кг жоғары. Бәйгеде – 37 адам. Шабандоздар 5 шақырымдық тай жарысында және 23 шақырымдық аламан бәйгеде жарысты. Жарыстың жалпы жүлде қоры 4 млн теңгені құрады. Мұның бәрі демеушілік қаражат, – дейді спорттық іс-шараларды ұйымдастырушы Асылназ Жұмашев.

Демеушілер – ауыл тумалары мен тұрғындары, сондай-ақ жергілікті фермерлік шаруашылықтары атынан мерекелік отшашу ұйымдастырылды.