Қарағандылық Сабыржан Аққалықов бокстан жастар арасында әлем чемпионы атанды

Қарағандылық Сабыржан Аққалықов Кельц қаласында (Польша) өткен бокстан жастар арасындағы әлем чемпионатында 64 келі салмақ дәрежесінде үздік атанды.

Шешуші жекпе-жекте Сабыржан Украинаның төрт дүркін чемпионы Бозорбой Матякубовпен кездесті. Төрешілердің бірауыздан қабылданған шешімімен бұл жекпе-жекте жерлесіміз жеңіске жетті.

Сабыржан 18 жаста, ол бес жыл бойы бокспен айналысады. Оны Александр Насибулин жаттықтырады.

Естеріңізге сала кетейік, бокстан жастар арасындағы әлем чемпионаты 13-23 сәуір аралығында Польшада өткен болатын. Оған барлығы 66 елден 487 мықты жас боксшы қатысты. Жалпы есепте Қазақстанның ерлер және әйелдер құрамасы 10 медаль жеңіп алды.