Қарағандыда Ұлттық домбыра күніне орай «Ұлы дала үні» атты музыкалық мереке өтеді

Қарағанды қаласының Орталық мәдениет және демалыс саябағында 5 шілде күні Ұлттық домбыра күніне арналған «Ұлы дала үні» атты музыкалық мереке өтеді. Ауқымды мәдени шара қазақтың дәстүрлі музыкасының таңдаулы орындаушыларын, танымал өнерпаздарды және шығармашылық ұжымдарды бір сахнада тоғыстырады.

Күндізгі бағдарлама сағат 12:00-де басталады. Көрермендер алдында Тәттімбет атындағы қазақ халық аспаптары академиялық оркестрі мен «Назқоңыр» ансамблі өнер көрсетеді. Бағдарламаның басты оқиғаларының бірі – республикалық және халықаралық байқаулардың лауреаттары Мақсат Аханов, Дидар Ками және Нұрмұхамед Байсүгіров қатысатын «Құлманбет айтысы» болмақ.

Күндізгі бағдарламаның басты қонағы – Қазақстан Республикасының еңбек сіңірген қайраткері Асылбек Еңсепов. Ол Қарағандының жас домбырашыларымен бірге сахнаға шығып, көрермендерге ерекше концерттік бағдарлама ұсынады.

Мереке кешкі сағат 19:00-де «Домбыра сазы қалықтаған кеш» атты концертпен жалғасады. Сахнада «Сардар» тобы, «Тарту» дуэті, «Тарланс» этнотобы және қаланың дарынды өнерпаздары өнер көрсетеді.

Кештің арнайы қонақтары – белгілі қобызшы Олжас Құрманбек, домбырашылар дуэті Темірлан мен Ернат, «Қазақша терапия» вокалды-аспаптық ансамблі және әнші Асет Есжан. Олар домбыра, қобыз және заманауи музыкалық өңдеулерді үйлестірген ұлттық өнердің жарқын туындыларын көрермен назарына ұсынады.

Мереке қала әкімдігінің қолдауымен ұйымдастырылады. Ұйымдастырушылар қала тұрғындары мен қонақтарын Қазақстанның бай мәдени мұрасына арналған ауқымды музыкалық мерекенің бір бөлігі болуға шақырады.

Өтетін күні: 5 шілде.

Күндізгі бағдарлама: 12:00–15:00.

Кешкі бағдарлама: 19:00–21:00.

Өтетін орны: Қарағанды қаласының Орталық мәдениет және демалыс саябағы.