Бұқар жырау ауданында сүт өнімдерін өндіру көлемі артып келеді
Қарағанды облысында ауыл тұрғындары өз кәсіптерін дамыту үшін кооперативтерге бірігуде. Бұқар жырау ауданында мемлекет қолдауына ие болған 20 ауыл шаруашылығы кооперативі жұмыс істейді.
Үштөбе ауылында сүт өңдеу цехы ашылып, небәрі бір жылдың ішінде жаңа деңгейге көтерілді. Облыс әкімі Ермағанбет Бөлекпаев фермерлермен кездесіп, кәсіпорынның жұмысымен танысты.
«DG-сүт» ӘКК төрағасы Күләш Серікованың айтуынша, жоба 50-ге жуық жеке шаруашылықты біріктірді. Цехта 11 адам еңбек етеді.
Қайта өңдеу көлемі тәулігіне тоннаға жетті.
Қазір майдан, қаймақтан және сүзбеден басқа жұмсақ ірімшік пен құрт шығарады. Өнім балабақшаларға, мектептерге және басқа да мемлекеттік мекемелерге жеткізіледі. Ауыл шаруашылығы кооперативі сауда үйлерімен де шарттар жасасады.
Жоспарда өнім ассортиментін кеңейту бар.
– «Ауыл аманаты» бағдарламасы бойынша шағын несие алып, сүт және ашыған сүт өнімдерін өңдейтін жаңа жабдық сатып алдық. Бұл қайта өңдеу көлемін тәулігіне үш тоннаға дейін ұлғайтуға және қосымша 10 жұмыс орнын құруға мүмкіндік береді, – деп хабарлады Күләш Серікова.
Жұмыс сапары барысында өңір басшысы «Ақнар» құс фабрикасында да болды.
Онда оған жасанды интеллектпен жабдықталған жаңа құс қорасы таныстырылды.
Мұнда ақылды климаттық бақылау жүйесі нақты уақыт режимінде көрсеткіштерді талдап, құстың жасына және сыртқы орта жағдайларына қарай параметрлерді автоматты түрде реттейді.
Бұл технология өнім сапасын арттыруға әрі жабдықтарды дәл басқару арқылы энергия ресурстарын үнемдеуге мүмкіндік береді.
Өндірісті жаңғырту жалғасуда. Ермағанбет Бөлекпаев 20 мың басқа арналған тағы бір заманауи құс фабрикасының құрылысында болды.
Кәсіпорын директоры Виктор Колчев биылғы жылы Үштөбе аумағында алты жаңа құс қорасын іске қосу жоспарланып отырғанын, олар үшін қазіргі заманғы жабдықтар сатып алынғанын хабарлады. Компания таяу жылдары өндіріс көлемін екі есеге арттыруға ниетті. Ал бройлер етін қайта өңдеуді ұлғайту үшін жаңа сою цехын салмақшы. Бұл жаңа жұмыс орындарын ашады және өңірдің азық-түлік қауіпсіздігін арттырады.
Сонымен қатар облыс әкіміне алдағы жылыту маусымына дайындық барысы туралы баяндалды. Қушоқы кентінде маңызды жобалардың бірі – жаңа модульдік қазандықтың құрылысы аяқталуға жақын.
Жаңа нысан 1971 жылдан бері жұмыс істеп келе жатқан ескі жылу көзінің орнын басады. Қазір ғимараттың қаңқасы тұрғызылып, әрқайсысының қуаты 4 МВт болатын бес қазандық орнатылған.
Мердігер ұйым жақын арада құрылыс жұмыстарын толық аяқтауы тиіс. Одан кейін нысанның сенімділігін тексеру үшін сынақтар жүргізіледі.
Жаңа қазандықтың іске қосылуы кенттегі жылумен жабдықтау жүйесінің сенімділігін арттырып, тұрғындарға жылыту маусымында анағұрлым қолайлы жағдай жасауға мүмкіндік береді.