Қарағанды облысында ауыл шаруашылығы жәрмеңкелерінде 2 мың тоннадан астам өнім сатылды

Қарағанды облысында жыл басынан бері 136 ауыл шаруашылығы жәрмеңкесі өтті. Фермерлерден тікелей, нарықтан төмен бағамен сауда жасау тұрғындар арасында сұранысқа ие: жалпы көлемі 2150 тонна өнім 1,2 млрд теңгеге сатылған. Бұл тетік бағаны тұрақтандыру мен жергілікті ауыл шаруашылығы тауар өндірушілерін қолдаудың тиімді құралдарының бірі болып отыр.

Ауыл шаруашылығы басқармасының мәліметінше, тек сәуір айында 47 жәрмеңке ұйымдастырылып, шамамен 490 тонна өнім өткізілген. Жәрмеңкелерге облыстың жеті ауданынан келген фермерлер, сондай-ақ алты қаланың қайта өңдеу кәсіпорындары қатысқан.

Алдағы айларда жәрмеңке форматы біршама өзгереді: Қарағандыда олар күзде, егін жиналғаннан кейін қайта жанданады. Ал серіктес қалалар мен аудандарда сенбі күндері шағын жәрмеңкелер форматында тұрақты түрде өткізіліп тұрады. Мамыр айында тағы 43 жәрмеңке ұйымдастыру жоспарланған.

Жалпы, биыл өңірде 560-тан астам ауыл шаруашылығы жәрмеңкесін өткізу көзделіп отыр. Әдеттегідей, негізгі көлем күз мезгіліне тиесілі — бұл кезде фермерлер жаңа өнім ұсынып, ет жеткізу көлемін арттырады.