Қарағанды техникалық-құрылыс колледжіне жаңа атау мен жаңа мәртебе берілді

Қарағанды техникалық-құрылыс колледжі бұдан былай Инжиниринг жоғары колледжі деп аталады. Атаудың өзгеруімен бірге оқу орнының мәртебесі де жаңарып, білім беру мазмұны кеңейіп, мамандарды даярлаудың сапалы жаңа деңгейіне көшу жүзеге асырылуда. Бұл шешім колледждің даму бағыты мен еңбек нарығындағы қазіргі сұранысқа тікелей байланысты.

— Біз білім беру бағыттарын кеңейтіп, жоғары білікті мамандарды даярлауға көшіп отырмыз. Колледж инженерлік бағытты одан әрі дамытып, құрылыс, сәулет, дизайн және цифрлық технологиялар салалары бойынша кадр даярлауды күшейтеді. Бұл студенттер үшін білім алу мен кәсіби тұрғыда өсуге кең мүмкіндіктер ашады, — деді колледж директоры Әсел Сапарова.

Оқу орнындағы басты жаңашылдықтардың бірі — қолданбалы бакалавриат бағдарламаларын енгізу. Бұл формат теория мен тәжірибені ұштастырып, кәсіби дағдыларды терең меңгеруге бағытталған. 

Алдағы уақытта «Азаматтық ғимараттарды жобалау, реставрациялау және реконструкциялау» мамандығы бойынша жаңа бағдарлама іске қосылмақ. Бұл қазіргі заманғы жобалау, қалпына келтіру және цифрлық модельдеу технологияларын меңгерген мамандарға деген сұраныстың артуымен тікелей байланысты.

Колледждің мүмкіндіктері Әбілқас Сағынов атындағы Қарағанды техникалық университетімен орнатылған әріптестік арқылы да кеңеюде. 

Жасалған келісім аясында екі тарап «сәулет» және «азаматтық ғимараттарды жобалау, реставрациялау және реконструкциялау» бағыттары бойынша бірлескен білім беру және материалдық-техникалық базаны пайдаланады. Бұл студенттерді даярлау жүйесін тұтастандырып, тәжірибелік оқытудың аясын айтарлықтай кеңейтеді.

Сонымен қатар «орта кеңістіктер сәулеті» бағыты бойынша қолданбалы бакалавриат бағдарламасын енгізу мәселесі қарастырылып жатыр. 

Бұл модель білім берудің үздіксіздігін қамтамасыз етеді: колледж түлектері бұрын меңгерген пәндерін қайта есепке алу арқылы жоғары оқу орнында қысқартылған оқу бағдарламасы бойынша білімін жалғастыра алады.