Қарағандылық Даниял Сапенов жасөспірімдер арасындағы шахматтан әлем чемпионатында күміс жүлдегер атанды

Сербияның Врнячка-Баня қаласында 8 бен 18 жас аралығындағы жасөспірімдер арасында рапид және блиц бойынша әлем чемпионаты өтті. Турнирге 40 елден 437 шахматшы қатысып, жасөспірімдер күнтізбесіндегі ең ауқымды жарыстардың біріне айналды. Сондай-ақ ол әлемнің түкпір-түкпірінен келген жас ойыншылардың жоғары дайындық деңгейін көрсетті.

Қазақстан құрамасы 21 медаль жеңіп алды, оның ішінде тоғызы — алтын. Бұл — еліміздің осындай жарыстар тарихындағы ең үздік нәтижесі. Турнир қорытындысы бойынша қазақстандық команда жалпыкомандалық есепте сенімді түрде бірінші орынды иеленіп, жасөспірімдер деңгейінде шахматтағы жетекші державалардың бірі екенін тағы да дәлелдеді.

Осы табысқа қарағандылық дарынды шахматшы Даниял Сапенов елеулі үлес қосты. Ол 18 жасқа дейінгі санатта рапид бойынша әлем чемпионатының күміс жүлдегері атанды.

Даниял Сапенов — ФИДЕ шебері және қазақстандық шахмат мектебінің ең болашағы зор өкілдерінің бірі. Бұған дейін де ол халықаралық аренада елеулі жетістіктерге қол жеткізген: өз жас санатында блицтен әлем чемпионы атанып, рапидтен қола медаль иеленген.

Қарағанды облысы Дене шынықтыру және спорт басқармасының ақпараты бойынша