Қарағанды облысында иммундау апталығы өтуде

19–25 сәуір аралығында бүкіл әлемде Еуропалық иммундау апталығы өтуде. Биылғы ұраны — «Вакциналар әр буын үшін тиімді». Қарағанды облысы да қауіпті инфекциялардан халықты қорғауға, ұжымдық иммунитет қалыптастыруға және вакцинацияға деген сенімді арттыруға бағытталған бұл бастамадан тыс қалған жоқ.

Акцияның маңыздылығы мен балаларды вакцинациялауға саналы көзқарас туралы Өңірлік коммуникациялар қызметі алаңында өткен брифингте айтылды.

— Қазақстанда иммундау мәселелері денсаулық сақтау саласындағы басым бағыттардың бірі. Елімізде вакцинация әрбір азаматқа қолжетімді әрі тегін жүргізіледі. Екпелердің арқасында вакцинаның көмегімен басқарылатын инфекциялар бойынша сырқаттанушылық деңгейі айтарлықтай төмендеді, — деді санитариялық-эпидемиологиялық бақылау департаменті басшысының орынбасары Гүлжан Байғұтанова.

Спикер нақты мысалдар келтірді: Қарағанды облысында вакцинацияның нәтижесінде сіреспе ауруы соңғы рет 2019 жылы, дифтерия — 2000 жылы, қызамық — 2006 жылы тіркелген. Соңғы жылдары 14 жасқа дейінгі балалар арасында В вирусты гепатитімен сырқаттану деректері мүлде тіркелмеген.

Сонымен қатар мамандар сақталып отырған қауіптерге де назар аударады. Өңірде қызылша мен көкжөтел жағдайлары тіркелуде. Санитариялық дәрігерлердің мәліметінше, науқастардың басым бөлігі — екпе алмаған балалар мен жасөспірімдер. Бұл уақытылы вакцинацияның маңызын тағы да дәлелдейді.

Иммундау апталығы аясында облыста ақпараттық-түсіндіру және профилактикалық іс-шаралар өткізіліп, екпе алмаған балалар мен ересектерді қамту жұмыстары жүргізілуде.

Гүлжан Байғұтанова ұлттық егу күнтізбесіне 21 инфекциялық ауруға қарсы вакциналар енгізілгенін еске салды. Қазақстанда Дүниежүзілік денсаулық сақтау ұйымы сертификаттаған және елде ресми тіркелген вакциналар қолданылады.