Қарағандыда халықаралық сарапшылардың қатысуымен WorldSkills және Abilympics чемпионаттарына дайындық күшейтілуде
Аспаздық іс, кірпіш қалау және шаштараз өнері — Қарағандыда кәсіби шеберліктің халықаралық WorldSkills және Abilympics чемпионаттарына қажетті ең сұранысқа ие құзыреттер бойынша оқу-практикалық семинар өтіп жатыр. Қатысушылар тек байқау стандарттарын меңгеріп қана қоймай, оларды тәжірибеде — шеберханаларда тәжірибелі тәлімгерлердің жетекшілігімен пысықтауда.
Сарапшылар қатарында Мәскеу мен Санкт-Петербург қалаларынан келген мамандар бар. Олар халықаралық деңгейдегі жарыстарға қатысып, жеңімпаздарды дайындау тәжірибесіне ие.
Семинарды «TALAP» КеАҚ қолдауымен ProfSkills біліктілікті арттыру орталығы ұйымдастырып, Қарағанды тамақтану және сервис колледжі базасында өткізуде.
— Біздің сарапшылар бірнеше рет халықаралық чемпионаттарға қатысып, әлемдік деңгейдегі жеңімпаздарды дайындаған. Олар талаптардың тек қағаз жүзінде емес, іс жүзінде қалай орындалатынын жақсы біледі, — дейді орталық басшысы Григорий Кныш. — Біз заманауи стандарттарды және қатысушыларды даярлаудың нақты ерекшеліктерін талқылаймыз. Бұл — жарыс алаңында шешуші рөл атқаратын маңызды факторлар.
Оқу жеті құзыретті қамтып, үш алаңда ұйымдастырылған. Тамақтану және сервис колледжінде аспаздық, кондитерлік және наубайшылық бағыттары бойынша шеберлік сабақтары өтуде.
Техникалық-құрылыс колледжінде қатысушылар кірпіш қалау мен флористиканы меңгерсе, технология және сервис колледжінде «сән технологиясы» және «шаштараз өнері» бағыттары қамтылған.
Практикумға Қазақстанның түрлі өңірлерінен техникалық және кәсіптік білім беру жүйесінің 64 өкілі қатысуда. Олардың қатарында оқытушылар, өндірістік оқыту шеберлері және студенттер бар. Қатысушылардың басым бөлігі желтоқсан айында Астанада өтетін ұлттық чемпионатқа дайындалуда.
Бағдарлама аясында кәсіби дағдылармен қатар психологиялық дайындыққа да ерекше назар аударылған.
— Байқау барысында бағдарламада да, күтпеген жағдайларда да жылдам бағдар таба білу маңызды. Егер бәрі жоспар бойынша жүрмесе, шешімді дәл сол сәтте қабылдау қажет. Әйтпесе ұпай жоғалту қаупі бар, — деп атап өтті кондитерлік іс бойынша халықаралық сарапшы, Мәскеу аспаздар қауымдастығының мүшесі, көптеген байқаулардың жүлдегері Марина Девятко.
Практикумның жеке бағыты Abilympics қозғалысына арналған — бұл мүмкіндігі шектеулі жандарға арналған кәсіби шеберлік чемпионаты. Қазіргі таңда оған 50-ден астам ел қатысады. Ресейде биыл бұл чемпионат 11-рет өтуде, ал Қазақстан алғаш рет қатыспақ.
— Бұл WorldSkills-тегі құзыреттерге ұқсас, алайда мұнда әлеуметтік бейімделу мен кәсіби іске асуға басымдық беріледі, — дейді Ресейдегі чемпионаттың құзыреттер кеңесінің төрайымы Светлана Алешина. — Мүмкіндігі шектеулі адамдар үшін кәсіби шектеулер көпшілік ойлағандай кең емес.
Қатысушылар арасында әртүрлі мүгедектік түрі бар жандар бар: арбадағы қатысушылар, көру қабілеті нашар мамандар. Сарапшылар қатарында кәсіби жетістікке жеткен танымал тұлғалар да бар. Мәселен, «вокалдық шеберлік» бағыты бойынша бас сарапшы — Диана Гурцкая.
Практикум бес күнге созылып, алдағы ұлттық жарыстарға дайындықтың маңызды кезеңдерінің біріне айналмақ.