Қарағанды облысында медициналық сақтандырумен қамту деңгейі 88,7%-ға жетті

Қарағанды облысында сақтандырылмаған тұрғындар саны азайып келеді — бірінші тоқсанның қорытындысы бойынша оң динамика сақталып, міндетті әлеуметтік медициналық сақтандыру жүйесімен қамту деңгейі 88,7%-ға жетті.

Міндетті әлеуметтік медициналық сақтандыруға қатысты өзекті мәселелер облыс әкімінің орынбасары Ораз Тәуірбековтың төрағалығымен өткен өңірлік штаб отырысында талқыланды. Күн тәртібінде — халықты жүйеге тарту, жарналардың уақытылы төленуі және медициналық көмек көрсету кезінде талаптардың сақталуы мәселелері қаралды.

Заңнамаға енгізілген өзгерістерге сәйкес, 2026 жылдан бастап шұғыл және дағдарыстық санаттағы азаматтар үшін, сондай-ақ жұмыссыздар үшін МӘМС жарналары жергілікті бюджет қаражаты есебінен төленеді.

— Сақтандырылмаған азаматтар санының азаюы бойынша тұрақты оң динамиканы байқап отырмыз. Қол жеткізілген қарқынды төмендетпей, әсіресе экономикалық белсенді халық арасында атаулы ақпараттық-түсіндіру жұмыстарын күшейту маңызды, — деді Қарағанды облысы бойынша Әлеуметтік медициналық сақтандыру қоры филиалының директоры Фазыл Копобаев.

Отырыста жұмыс берушілердің берешегі мәселесі қаралды. Сондай-ақ медициналық қызмет көрсетудің заңдылығына ерекше назар аударылып, рұқсат құжаттарына толық түгендеу жүргізу тапсырылды.

Ораз Тәуірбеков барлық мемлекеттік органдар мен ұйымдардың жүйелі әрі үйлесімді жұмыс істеуінің маңыздылығын атап өтті.

— МӘМС жүйесін тиімді іске асыру — халыққа медициналық көмектің қолжетімділігі мен сапасының кепілі, — деді ол.

Барлық бағыттар бойынша жұмыстар жалғасады, берілген тапсырмалардың орындалу қорытындылары штабтың келесі отырысында қаралады.

Қарағанды облысы бойынша Медициналық сақтандыру қоры филиалының баспасөз қызметінің ақпараты бойынша