Қарағандылықтарды «Таза аула» акциясына қатысуға шақырады

Наурызнама онкүндігін қорытындылайтын «Тазару күні» аясында «Жилой фонд» құрылыс компаниясы қала тұрғындарына арналған «Таза аула» экологиялық челленджін бастады. Байқауға қаладағы барлық көпқабатты тұрғын үйлер қатыса алады.

Қатысу үшін тұрғындар бірігіп, ауладағы тазалық жұмыстарын жүргізуі, нәтижені фото немесе видеоға түсіріп, әлеуметтік желілерде мекен-жайымен және келесі хэштегтермен жариялауы қажет: #ЧистыйДвор #ТазаАула #ТазаруКүні #ТазаҚазақстан.

Челлендждің негізгі мақсаты – тек тазалықты қамтамасыз ету ғана емес, сонымен қатар көршілік қарым-қатынасты нығайту, қоршаған ортаға деген қамқорлық үлгісін көрсету және қаланы таза әрі көрікті ету.

Байқау бір ай бойы жалғасады. Осы уақыт ішінде арнайы комиссия аула тазалығы, абаттандыру деңгейі және тұрғындардың белсенділігін бағалайды. Қатысушылар саны мен белсенділік неғұрлым жоғары болса, жеңіске жету мүмкіндігі соғұрлым артады.

Байқау қорытындысында ең белсенді әрі достық аула анықталады. Жеңімпаздарды басты сыйлық – «Жилой фонд» компаниясының аула аумағын толық абаттандыруы күтеді.