«Көктем-2026»: Қарағанды облысында құтқарушылар су тасқыны жағдайындағы іс-қимыл алгоритмін пысықтады
Қарағанды облысында «Көктем-2026» республикалық командалық-штабтық оқу-жаттығулары өтті. Құтқару және инженерлік бөлімшелер су тасқыны жағдайы күрделенуі мүмкін болған жағдайда атқарылатын іс-қимыл алгоритмдерін пысықтады: күштерді толық жауынгерлік әзірлікке келтіруден бастап техниканы шартты түрде зардап шеккен өңірлерге жеткізуге дейін.
Саптық байқаудан кейін бөлімшелер колонналар жасақтауға кірісті. Оқу-жаттығу аңызына сәйкес, күштердің бір бөлігі топтастыруды күшейту үшін Солтүстік Қазақстан облысына жіберілді.
Мамандар автоколонна құрып, қозғалысқа шығу тәртібін, жол қозғалысын басқаруды, сондай-ақ жол және қамтамасыз ету қызметтерімен өзара іс-қимылды пысықтады. Экипаждар арасындағы тұрақты байланыс пен үйлесімділікке ерекше назар аударылды.
Сонымен қатар инженерлік және арнайы техниканы теміржол платформаларына тиеу жұмыстары жүргізілді.
Сценарий бойынша техника Батыс Қазақстан облысының шартты түрде зардап шеккен ауданына жөнелтілді. Мамандар қауіпсіз тиеу, ауыр техниканы сенімді бекіту және тасымалдау кезінде сүйемелдеуді ұйымдастыру мәселелерін пысықтады.
Мұндай тәсіл қажеттілік туындаған жағдайда елеулі күштерді алыс қашықтыққа жедел жеткізу үшін нақты жағдайларда қолданылады.
Абай ауданы Самар ауылдық округінің «Огород» бөлімшесінде қорғаныс бөгетін нығайту жұмыстары жүргізілді. Сонымен қатар ықтимал су басу аймағынан тұрғындарды эвакуациялау ұйымдастырылды.
Қауіпсіз жерде зардап шеккен халықты қабылдау пункті ашылып, онда келгендерді тіркеу, ыстық тамақпен қамтамасыз ету, медициналық тексеру жүргізу және алғашқы көмек көрсету шаралары қамтамасыз етілді. Денсаулық сақтау, полиция және жергілікті атқарушы органдардың өзара іс-қимылы да жеке тексерілді.
«Көктем-2026» оқу-жаттығулары көктемгі кезеңге техниканың, хабарландыру жүйелерінің және жеке құрамның дайындығын кешенді түрде бағалауға мүмкіндік берді.
Тексеру су тасқыны қаупі төнген жағдайда қызметтердің қаншалықты жедел әрекет ете алатынын және уақыт шектеулі жағдайларда ведомствоаралық өзара іс-қимылдың қаншалықты тиімді ұйымдастырылғанын көрсетті.