Қарағанды колледждерінің студенттеріне ақпараттық қауіпсіздік шаралары мен құқықтық жауапкершілік туралы түсіндірілді

Қылмыстық схемаға қалай қатысушы болып кетпеуге және жеке деректерді қалай қорғауға болатыны жөнінде Қарағанды қаласындағы Ж. К. Бөкенов атындағы Қарағанды банк колледжінде өткен профилактикалық кездесуде құқық қорғау органдарының өкілдері студенттермен әңгіме жүргізді. Іс-шара «Заң және тәртіп» тұжырымдамасы негізінде жүзеге асырылып жатқан «Құқық тәртібі әліппесі» жобасы аясында ұйымдастырылды.

Кездесудің бастамашысы Қарағанды облысының прокуратурасы болды, оған өңірлік Полиция департаменті қатысты. Аудиторияға қаладағы техникалық және кәсіптік білім беру ұйымдарының білім алушылары жиналды.

Негізгі мақсат — жастар ортасында құқықтық сауаттылықты арттыру арқылы қылмыстың алдын алу. Кездесуді ашқан облыс прокурорының орынбасары Еділ Жұбанов қаскүнемдер жас азаматтардың сенгіштігі мен өмірлік тәжірибесінің аздығын жиі пайдаланып, оларды интернет-алаяқтықтан бастап заңсыз қаржылық операцияларға қатысуға дейінгі құқыққа қайшы схемаларға тартатынын атап өтті. Соның салдарынан жастар қылмыстарға сыбайлас болып, қылмыстық жауапкершілікке тартылады.

Студенттерге заңнама нормалары еске салынды, ақпараттық қауіпсіздік ережелері мен жеке деректерді үшінші тұлғаларға берудің тәуекелдері жан-жақты түсіндірілді. Күмәнді онлайн-жобаларға қатысу және «жеңіл табыс» ұсынатын ұсыныстардың соңы ауыр құқықтық салдарға әкелуі мүмкін екеніне ерекше назар аударылды.

Кездесу форматы интерактивті сипатта өтті: қатысушыларға профилактикалық бейнеролик көрсетіліп, дәрістер мен тақырыптық ойындар ұйымдастырылды. Бұл білімді тәжірибе жүзінде бекітуге мүмкіндік берді.

Колледж басшылығының айтуынша, мұндай іс-шаралар жастардың берік құқықтық ұстанымын қалыптастыруға, мемлекеттік институттарға деген сенімді нығайтуға және заңға құрмет сезімін тәрбиелеуге ықпал етеді. Студенттер диалогқа белсенді қатысып, сұрақтар қойып, құқық бұзушылықтардың алдын алу ісінде құқық қорғау органдарына қолдау көрсетуге дайын екендіктерін білдірді.