AgroSky: Қарағандыда дрондар мен жасанды интеллект фермерлердің шығындарын қысқартып, өнімділікті арттыруға көмектесуде
Қарағандыда фермерлердің су, тыңайтқыш және жанармайға кететін шығындарының үштен бірін азайтып, сонымен бірге өнімділікті арттыра алатын технология әзірленді. Әбілқас Сағынов атындағы Қарағанды техникалық университетінің екі түлегі және бір қызметкері негізін қалаған AgroSky стартапы ауыл шаруашылығын басқарудың жаңа тәсілін ұсынып отыр: жүйе арнайы дрондар мен жасанды интеллект алгоритмдерінің көмегімен егістік пен топырақтың жағдайын талдайды.
Жобаның өзегі — дәлдікке негізделген деректер. Дрондар алқаптарды жүйелі түрде шолып, мультиспектрлі бейнелер жинайды және оларды талдау платформасына жібереді. Жасанды интеллект алынған ақпаратты өңдеп, проблемалы аймақтарды анықтайды, тыңайтқыштардың оңтайлы мөлшерін есептейді және суаруға қатысты нақты ұсынымдар қалыптастырады. Бұл тәсіл суды және тыңайтқышты артық жұмсап қоюдың алдын алып, ресурстарды тек шын мәнінде қажет учаскелерге бағыттауға мүмкіндік береді.
Алдын ала есептеулерге сүйенсек, жаңа технология су, тыңайтқыш және жанармай шығындарын шамамен 30%-ға төмендетуге, ал өнімділікті 10–15%-ға арттыруға қабілетті. Биылғы жазда дрондар алғашқы далалық сынақтардан өтті.
— Біз Жартас ауылының маңындағы алқаптарда тәжірибелік-ғылыми әуебақылау жүргіздік. Мақсат — мультиспектрлі деректер жинап, алгоритмдердің нақты жағдайда жұмысын тексеру болатын. Жиналған материалдардың негізінде егістіктердің жағдайын көрсететін егжей-тегжейлі карта әзірледік. Ол фосфор, азот, калий және көміртектің жоғары шоғырланған аймақтарын, сондай-ақ агрономиялық стресс белгілері байқалған учаскелерді анықтап берді. Бұл деректер жабдықты калибрлеу, алгоритмдерді нақтылау және жүйені жаңа пилоттық сынақтарға дайындау үшін қажет, — дейді жобаның ғылыми жетекшісі Дмитрий Ожигин.
2025 жылдың көктемінде стартап халықаралық деңгейде таныла бастады — команда GCIP 2025 (Global Cleantech Innovation Programme) бағдарламасына қатысуға өтініш берді. Жоба халықаралық менторлардың кеңесіне, оқу бағдарламаларына және сараптамалық қолдауға қол жеткізді.
Акселерациялық бағдарламаға іріктеу кезеңдері көп және бәсекелестік жоғары болды. Жобалар инновация деңгейі, экологиялық тиімділігі, ауқымдану мүмкіндігі және технологиялық дайындық бойынша бағаланды. Шамамен 250 өтініштің ішінен AgroSky GCIP-Kazakhstan бағдарламасына өткен 50 команданың қатарына кірді.
— Акселераторға қатысу біз үшін зор серпін берді. Бұл гипотезаларымызды тексеруге, өнімді жетілдіруге, сарапшылардан құнды ұсыныстар алуға және жобаның дамуына арналған нақты стратегия құруға мүмкіндік берді, — деп атап өтті команда жетекшісі.